Read Siyin Chin Psalm Late 69 Bible Online

Psalm Late 69 - Siyin Chin bible

Psalm Late 69

¹Hong hun ta'n, Pathian awng! Tui in ka ngawng ciang hong khum hi;

²Buan thuk sungah ka tum suk a, lei ngum mun om ngawl hi; tui thukna sung ka theng a, tuihualte hangin tui ka ta dektak hi.

³Hu ngenin ka biapupuina taw ka tha bo a, ka longtawl taak hi. Nong hu tu kong zawzonna ka mit taak zo hi.

⁴Bangma thu om ngawl a, kei hong ensante sia ka lu a samzamte sangin tamzaw hi. Ka ngalte in kei langpanna leilot thu son hi; amate hat a, kei hong thatlum nuam hi. Ka nguk ngawl bul nate amate in hong pia kiksak hi.

⁵Pathian awng, ka mawnate nang kung panin kiseal ngawl hi; bangzata mawmaw ka hi sia nong he hi.

⁶Nangma hong muangte maizum a pia hong hisak heak in, Vaanglianpipa TOPA Vaanglianbelpa awng! Nangma hong biate tungah a mindaisak hong hisak heak in, Israel te ii Pathian awng.

⁷Kei hong kiselnona sia nangma hang hi a, maizumna taw ka kikhucip hi.

⁸Kei sia ka suapuite atu in khualmi bang ka hi a, ka innkuanpuite atu in ngamdangmi bang ka hi hi.

⁹Na Biakinnpi atu ka thangaina in ka sungah mei bangin kuang liang hi. nang hong kiselnona kammalte kei tung hong tu hi.

¹⁰An tanna taw keima le keima kiniamkhiak in ka om ciang, mihingte in hong phunsan hi;

¹¹heena lakna puante ka silh hi, tuaciangin amate in hong nuisan hi.

¹²Amate in lampite ah kei thu son a, zukhamte in kei huvau la phuak uh hi.

¹³Ahihang, TOPA awng, kei ka hile nang tungah thu kong ngen tu hi; na teal hun khat ciangin kong ngetna hong zo ta'n, Pathian awng. Nong itna lianpi hu in hong zo ta'n, banghang ziam cile kong hun tu ci na kamciam sia na kipsak hi.

¹⁴Buannawng sungah ka tumsuk natu panin hong hun ta'n; ka ngalte kung panin hong keamcing ta'n, tuithuk sung panin hong hun ta'n.

¹⁵Tuiliim namthuam in hong khumsak heak in; tui thukna ah hong tasak heak in a, thaankuul sungah hong taaksuksak heak in.

¹⁶TOPA awng, nong itna kip ii phatna sungah, kong ngetna hong zo ta'n; nong ciliapna lian taw kei sang hong nga ta'n!

¹⁷Na naseampa kung pan nangma le nangma kiseal heak in; kei sia ngimna lianpi thuak khi hi — tu mama in hong zo ta'n!

¹⁸Kei kungah hong pai ta'n a, hong hun ta'n; ka ngalte khut sung panin hong suatak ta'n.

¹⁹Kei hong kiselnona, hong min daisaknate le, hong ngen ngasaknate na he hi; ka ngalte theampo na mu hi.

²⁰Hong kiselnona in ka thin hong tamhsak a, thinkiam in ka om hi. Hesuakna ka lamet hang koima ah a om bua hi; heenepna muangmaw ka hihang ka mu zo bua hi.

²¹Ka ngilkial ciangin amate in nguu hong pia hi; ka dangko ciangin amate in zuhau hong pia hi.

²²Amate ii poai khaamnate in amate lalna hi tahen; amate ii a thiangtho kibuailamna sia amate kiamsuk natu hi tahen.

²³Amate a mit tawsakin! Amate a tawntungin a cingngu zawsak in!

²⁴Na thin uukna amate tungah tungsak in; na thangsiatna sia amate tungah tu tahen.

²⁵Amate ii ngiaphualte kinusia tahen; amate ii buk sungah kuama kihingkhoai heak hen.

²⁶Nangma ii daan na piak sate amate in vawtsia hi; nangma ii na liamsakte ii thuaknate amate in thuson in nei uh hi.

²⁷Amate mawna theampo tepteena khat nei in; nang ii ngupna sungah amate kihelsak heak in.

²⁸Nuntakna laibu sung pan amate min sia kimel tahen; na mite a kitepteena lai sungah amate kihel heak hen.

²⁹Ahihang kei sia na sa in thinkiam in ka om hi; Pathian awng, hong laamto ta'n a, hong hun ta'n!

³⁰La khat taw Pathian ka pok tu hi; ama ii letna sia ama tungah lungdamkona taw ka thangsak tu hi.

³¹Hisia in khuite taw ama biakpiakna sangin khuital khanthin sa khat taw sangaw biakpiakna a piak sangin TOPA lungdamsak zaw tu hi.

³²A kizothawte in hisia a mu uh ciangin a lungdam tu uh hi; Pathian a biate kihansua tu hi.

³³TOPA in a kitaangsamhte ngetna ngai a, thongtaak a mihingte a mangil bua hi.

³⁴Vantung le leitung awng, tuipi le a sung a om a nungta theampo awng, Pathian pok vun.

³⁵Ama in Jerusalem hun tu a, Judah khuapite sa kik tu hi. Ama mite tua munah teang tu a, tua leitang lua tu uh hi;

³⁶a naseamte ii suan le paalte in tua ngam lua tu a, ama a itte tua munah teang tu uh hi.