Read Siyin Chin Psalm Late 7 Bible Online

Psalm Late 7 - Siyin Chin bible

Psalm Late 7

¹TOPA ka Pathian awng, ka kidal natu in nang kong zuan hi, kei hong zuizente panin hong suatak ta'n a, hong hun ta'n;

²tua ahibuale hong hun thei tu a om ngawlna munah tawpi bangin kei hong kai tu a, tua munah amate in kei hong baltham tu hi.

³TOPA ka Pathian awng, khat pawpo tungah khialin ka lawm khat theamin ka zuak zong tua ahibuale a thu om ngawlin ka ngal pa tungah ka ngoltol le —

⁵tuasia ciang, ka ngalte in hong del tahen a hong man tahen, hong saatvawk tahen a, hong that tahen, tuaciang ka luanghawm sia lei ah hong nusia tahen.

⁶TOPA awng, na thin uukna taw hong tho to ta'n! ka ngalte thinsona a nalh tu in nangma hong ding ta'n; nangma le nangma hong kithaw ta'n a, hong hu ta'n! Nong tangkal sia thutang khenna ahi hi,

⁷mihingte theampo na kiimkot ah khawmtua in a, amate ii tungsia panin hong uk ta'n.

⁸Nangma in minam theampo ii thukhenpa na hi hi. TOPA awng, keima sang pangin thu hong khen ta'n, kei ka maw ngawl hunlam nong he hi.

⁹Nangma in a thutang Pathian na hi a, kote ngaisutna le ka deinate thu nong khen hi. A ngilote ii seksolnate tawpsakin, miphate thaman pia in.

¹⁰Pathian in kei hong dal pa ahi hi, ama in a thu a nite hun hi.

¹¹Pathian sia thutang thukhenpa ahi hi, tuaciang a tawntungin a seksolte a nil hi.

¹²A kisiik nuam ngawl a om le Pathian in a namsau tat hiam tu hi; ama in a thal keaksa in kinging zo hi;

¹³a kiitakhuai a ngalhiamte la zo hi, a meikuang thaltangte taw tuung zo hi.

¹⁴Mihing seksolte in bangbangin ngitlo tu ngaisun ziam ci sia he in; ngimna vawt nuam a, leilot thu zangh hi.

¹⁵Amate in ngual thaangsia a, tua thaang sungah amate awk uh hi.

¹⁶A ngamtat phat ngawlna teng sia amate tungah tu kik a, amate ii ngoltolna in amate nasak hi.

¹⁷TOPA sia ama thutang ahi hu in lungdam ka ko hi; A Saangbel Pa sia pokna la ka sak tu hi.