Read Siyin Chin Psalm Late 72 Bible Online

Psalm Late 72 - Siyin Chin bible

Psalm Late 72

¹Pathian awng, na thutang taw thu a khen natu in kumpipa thuhil in; nangma ii a kikhaikim thukhenna sia ama hawm in,

²tua hile ama in na mite thutang taw uk tu a, a kizothawte thumaanna taw uk tu hi.

³Ngam le lei in khantona nga tahen a, thutanna he tahen.

⁴Kumpipa in mizawngte tungah thutang in thukhen tahen a; a cimawte hu tahen a, Amate a zothawte zothal tahen.

⁵Hong pai tu khang hunte sungah ni a taan laiteng, tha ii khuavak a piak laiteng na mite in nang hong bia tahen.

⁶Kumpipa sia lo sungah nguazu bang, leitang tungah nguatui buak bang hi tahen.

⁷Ama khan sungah thutanna khangto tahen a, khantona sia tha in khuavak a piak lai theampo in om tahen.

⁸Ama ukna kumpi ngam sia tuipi khat pan tuipi khat dong kithung tu a, Euphrates ngun pan leimong dong hi tu hi.

⁹Sennealngammite in ama mai ah a kun tu uh hi; a ngalte lei ah a bok tu uh hi.

¹⁰Spain le tuikulhte kumpipate in ama letsong pia tu uh hi; Arabia le Ethiopia kumpipate in ama tel pia tu uh hi.

¹¹Kumpipa a kici theampo in ama mai ah kun tu uh a; minam theampo in ama atu sepsak tu uh hi.

¹²Ama a ko mizawngte theampo le a cimaw a kingaingonte theampo sia ama in suaktasak hi.

¹³Ama in mizawngte le a thazawmte mulkim a, a kitaangsamh te ii nuntakna a hun hi.

¹⁴Ama in amate sia kizawthawkna le ngoltolna panin suatak hi; amate nuntak sia ama atu in man nei hi.

¹⁵Kumpipa a khansau tahen! Ama sia Arabia pan khamhte kipia tahen; ama atu in thungetna a tawntung kivawt tahen; Pathian thupha ama tungah om tawntung tahen!

¹⁶Ngam sungah antang tam mama om tahen; mualte sia lo ante taw kituam tahen, tua lo ante sia Lebanon ah ankungte bangin tak nei in nga thiam tahen. Ngampa sung lopate taw kidim bang keakin khuapite sia mite taw kidim tahen.

¹⁷Kumpipa min kimangil ngei heak hen a; ni a taan laiteng ama minthang tahen. Kumpipa tungah ama in thupha a piak bangin minam tuatuamte in Pathian tungah thupha ngen tahen.

¹⁸Israel te ii Pathian, TOPA pok vun! Ama bekma in hi nalamdangte vawt hi.

¹⁹Ama min tuanngen sia a tawntungin pok vun! Ama ii minthanna in leitung bup ah dim tahen. Amen! Amen!

²⁰Hisia in Jesse ii tapa David ii thungetna a tawpna ahi hi.