Read Siyin Chin Psalm Late 73 Bible Online

Psalm Late 73 - Siyin Chin bible

Psalm Late 73

¹Pathian in thinsung thiangtho a nei Israel te atu in pha tatak hi.

²Ahihang ka thinmuanna ka thasua dedek a; ka upna bo dektak hi,

³banghang ziam cile keima in mihing seksolte atu in na theampo a dik veu in a pian ka mu ciangin a kiphasakte ka eang hi.

⁴Amate in natna thuak ngawl a; thahat in a ciidam uh hi.

⁵Midangte bangin amate in thuak ngawl uh a; ngualdangte ngim nga bangin amate ngim nga ngawl hi.

⁶Tua ahikom amate in kiphatsakna sia khi bangin aw a, ngoltolna sia puantual bangin sil uh hi;

⁷amate thinsung in ngitlona pusua in, a thinsung uh sia seksol tupnate taw komla uh hi.

⁸Amate in midangte nuisan zazaan in kamsia veu pau uh a; kiphasak in ngualdangte zawthawk sawm uh hi.

⁹Amate in vantung ah a om Pathian sonsia in leitung ah mihingte sia kiletsakna taw thupia uh hi,

¹⁰tuabangin Pathian ii mihingte ngawngawn in amate sangah kiheak in tuaciang amate son theampo a um papaih uh hi.

¹¹Amate in: “Pathian in he buan te; A saangbel Pa in phawk buan te” ci uh hi.

¹²Mihing seksolte in tuabang ahi uh hi. Amate hau a, nga thawthua lai uh hi.

¹³Tua ahile a thiangtho in kikeam a, mawna ka vawt ngawl sia a luithawthong ahi tu ziam?

¹⁴Pathian awng, nangma in nitangtumin nong thuaksak a; zing simin daan nong pia hi.

¹⁵Tuabangin kampau ka hi le, na mite khat ii ngamtat tu bangin a kilawm in ngamta ngawl ka hi tu hi.

¹⁶Hi thu haksa sia ngaisun tu in ka hanciam a,

¹⁷ahihang na Biakinn sung ka tum mateng in, kei atu haksa lei hi. Tua zawkciang mihing seksolte tungah bang piang tu ci in ka tel hi.

¹⁸Nangma in amate sia a naalna munah na koi tu a, siatcipna sungah na liiksak tu hi.

¹⁹Amate thakhat thu in kisusia in, a kiitakhuai sungah bocip uh hi.

²⁰Amate sia zingsang a, a bo vangeu zanmang bang ahi hi; nangma nong thaw tak ciang, Topa awng, amate mang vadi hi.

²¹Ka ngaisutna a siat ciang le ka thin a nat ciang,

²²kei sia nganhingte bangin ka mawmaw hi; nang kong tel bua hi.

²³Ahihang nang kungah a nai in kong om tawntung a, nangma in ka khut panin nong len hi.

²⁴Nong hilnate taw lam nong lak a, a tawpna ah nangma in upat minphatna taw nong saang tu hi.

²⁵Vantung ah nang simngawl bangdang ka nei ziam? Nang kong nei zawk nungsang leitung ah bangdang ka dei lai tu ziam?

²⁶Ka khua ngaisutna le ka pumpi thazawm tu hi. Ahihang Pathian sia ka thahatna hi; a tawntungin ka kisap sia ama bekma ahi hi.

²⁷Nang hong taisante lalcip nanak tu a; nang tungah hong thumaan ngawlte na susia tu hi.

²⁸Ahihang kei ka hile, Pathian nai ah ka om tu, TOPA Pathian ka belh tu le ama ii vawt sate theampo ka thansak tu sia bangza in pha ziam!