Read Siyin Chin Psalm Late 75 Bible Online

Psalm Late 75 - Siyin Chin bible

Psalm Late 75

¹Pathian awng, lungdam kong ko uh a, nang tungah lungdam hong ko hi ung! Nang bangza lian ci ka thangsak uh a, na vawtsa a lamdang nate ka son uh hi.

²Pathian in “Thukhen natu hun khat ka ciangtan zo a, thu maanna taw thu ka khen tu hi.

³Bitphua sa a nungta theampo liingin leitung mama a ngawk zongin a tawdapte a kho in ka koi tu hi.

⁴A seksolte a kisakthei ngawl natu ka son hi;

⁵a kisuantaakna uh a kheal natu ka son hi,” ci hi.

⁶Thukhenna sia nisuana le nitumna pan ahizong saksang pan le thangsang pan ahizong hong pai ngawl hi.

⁷Thukhenpa sia Pathian hi; ama in pawlkhat sia mawsak a, pawlkhat sia suaktasak hi.

⁸TOPA in a khut sungah hai khat toai in, a thin uukna zu ciik taw kidim hi. Ama in tua zu bungh keak in a seksol theampo in ne uh hi; a mal bo dongin amate in ne siat uh hi.

⁹Ahihang kei ka hile Jacob ii Pathian thu ka son tu le ama pokna la ka sak tu tawp ngeingawl tu khi hi.

¹⁰Ama in mihing seksolte thahatna suktansak tu a, ahihang thutangte thahatna sia kikhanto tu hi.