Read Siyin Chin Psalm Late 77 Bible Online

Psalm Late 77 - Siyin Chin bible

Psalm Late 77

¹Pathian tungah nging takin ka au hi; nging takin ka au ciang ama in hong za hi.

²Ngimna hun sung Topa tungah thu ka ngen hi; zankhuateakin thungen in ka khut ka laamto hi, ahihang heenepna ka mu bua hi.

³Pathian ka ngaisut ciangin ka vuisa hi; khua ka ngai susut ciang ka thinkiam hi.

⁴Ama in zankhuateak khangciim in hong koi hi; ka thinngim mama ahikom ka pau zo bua hi.

⁵A bosa nite ka ngaisun a, taanghlai kumte ka phawk hi.

⁶Zan hunte khua ngaisusutna in ka zangh hi; ka ngaisusun a, hi bangin keima le keima ka kidongh hi:

⁷“Topa in hong nial top tu ziam? Ama in eite dik hong sa ngei nawn ngawl tu ziam?

⁸Ama in eite hong it nawn ngawl ziam? A kamciamte kip nawn ngawl ziam?

⁹Pathian in hesuakna a nei tu mangil zo ziam? A thin uukna taw khuangai huai a sak theina theak zo ziam?

¹⁰Tuaciangin, “Na ka sakbel in hi thu ahi hi — Pathian sia a vaang lian nawn ngawl ci thu hi,” ka ci hi.

¹¹TOPA awng, na nasepna liante ka phawk tu hi; hun bosa sungah a lamdang na sepnate ka phawk kik tu hi.

¹²Na sepsa theampo ka ngaisun tu hi; a nasia mama na sepna theampo ka ngaisusun tu hi.

¹³Pathian awng, na sep na vawt theampo thiangtho hi. Nang za in a lian pathian om ngawl hi.

¹⁴Nangma in nalamdang a vawt Pathian na hi hi; na thahatna sia minam tuatuamte tungah na lak hi.

¹⁵Jacob le Joseph suan na mite, na vaangletna taw na hun hi.

¹⁶Pathian awng, tuite in nangma hong mu ciang lau uh a, tuipi tawtawngte liing hi.

¹⁷Meeikaaite in nguatui buak suk hi; van panin vanto ngingkeak a, khualengte mun theampo ah taangkeak hi.

¹⁸Na vanto sia a kipee in ngingkeak a, khualeng in leitung taangsak hi; leitung liingin ngawk hi.

¹⁹Tui kihualte tungah na vak hi; tuipi thuk, na kaantan hangin, na khuanite a kimu thei bua hi.

²⁰Nangma in Moses le Aaron ii a uk, na mite sia tuucingpa bangin lam na pui hi.