Read Siyin Chin Psalm Late 78 Bible Online

Psalm Late 78 - Siyin Chin bible

Psalm Late 78

¹Ka mite awng, kong hilna hong ngai tavun a, ka pauna hong nadon tavun.

²Ciim kamtepteete kong zangh tu a, hun bosa sung a, a telhak thute,

³ih taanghpupite hong son, ih zaaksa ih heaksa te, kong sonthiang tu hi.

⁴Hi thute ih tate tungah ih iim buatu hi. TOPA ii a vaangletna, a sepna liante le a vawtsa a lamdang nate sia khang kikte tungah ih son tu hi.

⁵Ama in Israel mite tungah thukhamte pia a, Jacob suan le paalte tungah thupiakte pia hi. Amate ii tate tungah ama ii thukhamte hil tu in ama in ih taanghpupite sawl hi.

⁶Tua hile khangkikte in tua thute he thei tu a, amate in a tate tungah sonsawn nanak tu uh hi.

⁷Hi bangin amate in zongh Pathian muang a, ama ii sepna sate mangil ngawlin, ama thupiakte ni tawntung tu uh hi.

⁸Amate in a langpante le thu ni ngawl, Pathian a upna uh a kho ngawl, ama tungah a thumaan top ngawl a taanghpupite bang ahi buatu uh hi.

⁹Ephraim mite in thal le thaltang taw kithoai napi ngal kido ni in taikeak uh hi.

¹⁰Amate in Pathian taw a thuciamna a len bua uh hi; ama thukham a zui bua uh hi.

¹¹Ama sep sate le, nalamdang lakna a vawt a mu uhte amate in a mangil zo uh hi.

¹²A taanghpupite ii mu tangin Egypt ngam Zoan zaangleitam ah Pathian in nalamdang laknate vawt hi.

¹³Ama in tuipi kikhensakin amate kaantansak hi; tuite sia pang bangin dingtosak hi.

¹⁴Ama in sun in meeikaai taw, zankhuateakin meikuang taang taw amate lampui hi.

¹⁵Ama in senneal ngamsung suangpite khentham in lei thukna pan a piang tui sia amate pia hi.

¹⁶Ama in suangpi sung pan lui khat piangsak a, ngun bangin tui luangsak hi.

¹⁷Ahihang amate in Pathian tungah khialna vawvawt lai uh a, sennealngam sungah amate in Saangbel Pa a langpan uh hi.

¹⁸A duci ante ngetna taw Pathian ze et hamtang uh hi.

¹⁹Amate in Pathian langpanin: “Pathian in sennealngam sungah an pia thei tu ziam?

²⁰Ama in suangpi saat in tui luangsak vahawn peu hi; ahihang ama in eite anluum zongh hong pia thei tu ziam? tuaciang ama ii mite sa pia thei tu ziam?” ci uh hi.

²¹Tua ahikom tuabangin amate pauna a zaak ciang Pathian a thin uuk hi; ama in a mite meikuang taw sim a, amate tungah a thin uukna sia khang seseam hi;

²²banghang ziam cile amate in ama sungah upna nei ngawl a, amate hun tu in um ngawl hi.

²³Ahihang ama in a tung a om van paupui a, a kongkhate a kihon natu thupia hi;

²⁴Ama in vantung panin amate antang pia a, amate neak tu in manna khiaksuk hi.

²⁵Tuabangin amate in vantunglalangte ii an ne uh a, Pathian in a du zaza pia hi.

²⁶Ama in nisuana sang vui vasak si a, ama ii vaangletna taw thangsang vui hamsak hi;

²⁷tuaciang a mite atu vacimte puaksuk a, vaalbo ah a om senneal za in tam hi;

²⁸ngiaphual saatna laizang a buk kiimkot theampo ah tua vacimte taak hi.

²⁹Tua ahiciang mite an ne in a lungkim uh hi; Pathian in amate a duci teng pia hi.

³⁰Ahihang amate duna sia thai ngawl a, a neneak laitak ma in,

³¹Pathian sia amate tungah thin uuk a, amate sung pan a hatbel pasalte le Israel khangno sung pan a phabel teng thatlum hi.

³²Hi zata hi napi mihingte in mawna vawt lalai uh hi; Ama nalamdang laknate om napi amate in ama a muang bua uh hi.

³³Tua ahikom amate ii ni sia husan khat bangin ama in bosak a, a nuntakna sia thakhat thu in lalna taw bosak hi.

³⁴Amate sung pan pawlkhat a thalup sim, a om lai teng in ama ii kung zuan a, kisiikin thin tak taw thungen uh hi.

³⁵Amate in Pathian sia amate a hungpa hi a, amate hu tu in Vaanglianbelpa hong pai ahi hunlam phawk uh hi.

³⁶Ahihang a pauna uhte leilot thu vive hi a, bangma ci takpi thu a om bua hi.

³⁷Ama tungah amate in thumaan ngawl hi; ama taw a thuciamna tungah amate thumaan ngawl hi.

³⁸Ahihang Pathian in ama mite hesuak hi. Amate mawna maisak a, a susia bua hi. Ama in tamvei mama a thin uukna iip in a thinsona vei kenkon hi.

³⁹Amate sia a thi theite ahi lel hunlam, vuiva a, a bo kik paih bang ahi hunlam ama in phawk hi.

⁴⁰Sennealngam sungah amate in ama bang tanvei langpan in, bang tanvei ama heesak ziam!

⁴¹Amate in Pathian ze et kikik uh a, Israel ii a thiangtho Pathian tungah thin natna piangsak hi.

⁴²Amate in ama ii vaangletna lian le a ngalte khut sung pan a suataksak ni mangil uh a,

⁴³Egypt ngam Zoan zaangleitam ah ama ii a nasia mama sepnate le nalamdang a laknate amate in mangil uh hi.

⁴⁴Ama in ngunte chisan suaksak a, Egypt mite in tui neak tu a nei bua uh hi.

⁴⁵Ama in tua mihingte sungah ngim pia tu in thote puak a, a leitangte lalsak tu in ulolte paisak hi.

⁴⁶Ama in amate lo an a ne tu le a lote a lalsak tu in khaumawte puak hi.

⁴⁷Ama in amate ii sapitkungte ngial taw, a thei kungte vuuk taw thisak hi.

⁴⁸Ama in a ngante ngial taw, a tuu a keal honte keaktang taw in thatlum hi.

⁴⁹Thina vantung mite bangin hong pai ama ii thin uukna le thinsona a buaksukna taw ama in nasia takin amate thinngimna pia hi.

⁵⁰Ama in a thin uukna iip ngawlin amate nuntakna uh khoaikhetsak ngawlin, pul natna taw amate thatlum hi.

⁵¹Ama in Egypt ngammite innkuan theampo sung pan a tapaciil teng thatlum hi.

⁵²Tuaciangin ama in tuucingpa bangin a mite lampui in pusuapui a, sennealngam kaantan pui hi.

⁵³Ama in amate ngammuang takin lampui a, amate a lau bua uh hi; ahihang tuipi in a ngalte khulum hi.

⁵⁴Ama in a zaw sa mualte tung, a thiangthona leitang ah amate paipui hi.

⁵⁵A mite a mainaw uh ciang tua ngamah a teang mite ama in notkeak hi; tua leitang sia Israel minamte hawmsakin amate ii innte sia a mite pia hi.

⁵⁶Ahihang amate in Vaanglianbelpa Pathian langpan in, a zia en uh hi. Amate in a thupiakte a zui bua uh hi,

⁵⁷ahihang amate sia a taanghpupite bangma in, langpan nopna thin le thumaan nop ngawlna thin nei uh a, thaltang koai khat bangma in muanhuai ngawl hi.

⁵⁸Amate in Pathian he ngawlte biakna munte taw ama thin uuksak uh a, amate ii milimte taw ama thinsosak uh hi.

⁵⁹Pathian in tuate a mu ciang a thin uuk ahikom, ama mite a nial thiang hi.

⁶⁰Ama in eite taw hong teenkhopna sa a inn ahi Shiloh a om ama buk sia nusia hi.

⁶¹Ama in ama ii vaangletna le minthanna lim ahi Thuciamna Thingkuang sia eima ngalte in mansak hi.

⁶²Ama ii mite tungah ama thin uuk ahikom a ngalte in ama ii mite thatsak hi.

⁶³Tangvalte sia ngal sungah kithatlum a, ngaknute ii a teenpui tu kuama a om bua hi.

⁶⁴Thiampite ngual ii khutsa taw in thi a, amate ii zi meingongte sia a kaa tu zongh ki oai ngawl hi.

⁶⁵A khakbel ciangin Topa sia a mutho bangin hong thoto hi; ama in sapittui ii a thot pasal thahat pa bang ahi hi.

⁶⁶Ama in a ngalte sia a kikhomsuan tu maizumhuai lelna sungah not kik hi.

⁶⁷Ahihang ama in Joseph suante a nial hi; ama in Ephraim minamte a tealtuam bua hi.

⁶⁸Tuate taangin ama in Judah minam le a it mama Zion Mual teal zaw hi.

⁶⁹Ama in vantung a om a inn taw a kibang Biakinn sia tua munah sa hi; A tawntung a kho tu in tuasia leitung taw ma kibangin ama in kipsak hi.

⁷⁰Ama in a naseampa David teal hi;

⁷¹Ama in David sia ngantatna munte ah tuuhon a cinna pan la a, Pathian mihingte ii tuucingpa ahi Israel te ii kumpipa suaksak hi.

⁷²David in ama ii kaang sung tu bek ngaisun ngawlin kipiakna taw amate khoi a, thiamna taw lampui hi.