Read Siyin Chin Psalm Late 80 Bible Online

Psalm Late 80 - Siyin Chin bible

Psalm Late 80

¹Israel te ii Tuucing pa awng, hong ngai ta'n; Na tuu hon lampuipa awng, hong za ta'n. Cherub te ii tung sang, na kumpi tokhum tungah a to pa awng,

²Ephraim, Benjamin le Manasseh minamte tungah nangma le nangma hong kilaak ta'n. Na thahatna kote hong lak ta'n; hong pai ta'n a, hong hun ta'n!

³Hong ciapui kik ta'n, Pathian awng! Na hesuakna hong lak ta'n, tua hile ka suakta tu uh hi!

⁴TOPA Vaanglianbelpa Pathian awng, bang tanvei dong na mihingte thungetna tungah hong thin uuk tu ni ziam?

⁵Heena sia neak tu in kote nong pia zo a, dawn tu in thitui haipui khat nong pia zo hi.

⁶Kote ii kiimkot ah ngamte kote ii leitang kituu in na kisimsak hi; ka ngalte in kote hong selno zazaan hi.

⁷Hong puuapha kik ta'n, Vaanglianbelpa Pathian awng! Na hesuakna hong lak ta'n, tua hile ka suakta tu uh hi.

⁸Nangma in sapitkung khat Egypt panin na la a, minam dangte hawlkeak in amate leitang tungah tuasia na suan hi.

⁹Nangma in tuasia a khan natu in mun khat na thiangsak hi; zung thuk thasuk a ngam bup huamin zaam hi.

¹⁰A limh taw mualte siin hi; a baakte in Cedar thingkung liante deap hi.

¹¹A baakte sia Mediterranean Tuipi dongin beak a, Euphrates ngun dong zaam hi.

¹²Banghangin a kiimkot uumna dalte talthamsak ni ziam? Tu in tua mun a kaantan pawpo in sapitngate ngu thei hi;

¹³ngalhte in siikcil a, ngamsate in an in nei hi.

¹⁴Vaanglianbelpa Pathian awng, ko sang hong nga ta'n! Vantung panin hong ensuk ta'n; hong pai ta'n a, na mite hong hun ta'n!

¹⁵Hong pai ta'n a, hi na suan sa sapitkung le a limcii tu na suan sapitkung moi sia hong hung ta'n!

¹⁶Ih ngalte in tua sapitkung sia mei taw halin saattan zo hi; amate sia thin uukna taw ngau in a, lalsak in!

¹⁷A thahat mama in na vawt minam, na tealsa mite dalin keamcing in.

¹⁸Nang kung panin ka tai kik ngei buatu uh hi; kote hong nungtasak ta'n, tua hile nang kong pok tu uh hi.

¹⁹Hong puuapha kik ta'n, TOPA Pathian Vaanglianbelpa awng. Na hesuakna hong lak ta'n, tuasia ciang ka suakta tu uh hi.