Read Siyin Chin Psalm Late 81 Bible Online

Psalm Late 81 - Siyin Chin bible

Psalm Late 81

¹Ei hong hungpa Pathian tungah lungdam in au vun; Jacob ii Pathian tungah pokna lasa vun!

²Music tum kipan vun a, daalkual khuangnote tum vun; tengtonghte le liamlote taw aw hoite ngingsak vun.

³Thadet ciang le thalik ciangin poaikhaam natu in lemle tum vun.

⁴Hisia in Israel ngamsung thukham hi a, Jacob' Pathian ii thupiak ahi hi.

⁵Ama in Egypt ngam a sim ciangin Israel mite tungah tua thukham a piak ahi hi. Heak ngeingawl aw khat in hi bangin a ci ka za hi,

⁶“Note nungzaang panin na vanhngit uh kong laakkeaksak hi; na puak uh uksuangte kong khiaksuksak hi.

⁷Ngim na nga laitakin nong sam uh a, kong hun hi. Ka bukna vuipi sung panin kong zo a, Meribah cikte ah note kong ze et hi.

⁸Ka mite awng, kidop natu kong sonte ngai vun; Israel awng, ka thu nong ngai tu uh ka thangai mama hi!

⁹Note in pathian dang peuma na bia ngei buatu uh hi.

¹⁰Keima in Egypt ngam pan note hong pusua pui TOPA na Pathian ka hi hi. Na kam uh kaa vun, an kong vaak tu hi.

¹¹“Ahihang ka mite in ka thu hong ngai nuam ngawl a, Israel te in ka thu hong ni ngawl tu hi.

¹²Tua ahikom amate sia a thinpuina uh taw kizui in a uuk bang po ka paisak a, a vawt nop po ka vawtsak hi.

¹³Ka mite in ka pau hong ngai hen a, ka thu hong ni le ka oai mama hi!

¹⁴A ngalte manlang takin ka zawsak tu a, a ngal a sa theampo ka zawthalsak tu hi.

¹⁵Kei hong ensante in kiitakna taw ka mai ah hong kun tu uh hi; amate ii thuak daan sia a tawntungin kikhomsuan tu uh hi.

¹⁶Ahihang note sia a limbel zungtaang taw kong vaak tu a, ngam khuaitui taw kong lungkimsak tu hi.”