Read Siyin Chin Psalm Late 84 Bible Online

Psalm Late 84 - Siyin Chin bible

Psalm Late 84

¹Vaanglianbelpa TOPA awng, na Biakinn bangza in thangai khi ziam!

²Tua munah bangza in om nuam khi ziam! TOPA Biakinn sungah om tu ka thangai hi. Ka nuntakna buppi taw a nungta Pathian tungah lungdam in la ka sa hi.

³Tonbawmte ngawngawn in bu vawt a, pialpiate in amate buk tek nei hi; amate in na biaknatau taw a kinaina ah a note keam uh hi, Vaanglianbelpa TOPA ka kumpipa le ka Pathian awng.

⁴Na Biakinn sungah teang a, a tawntung nang tungah pokna la a sate in mi lungdamte ahi uh hi.

⁵Nangma kung pan thahatna a ngate le a thiangtho Zion Mual ah Pathian biak tu a lawpte in bangza in lungdam ziam!

⁶Amate in Baca kongaw mualkuam a kaantan uh ciangin tua mun sia ciktui phulna mun hong suak hi; tangngam ngua in tuicin theina munte dimsak siat hi.

⁷Amate a papai uh ciang, hat vaial a, amate in pathiante ii Pathian sia Zion mual tungah a mu tu uh hi.

⁸TOPA Vaanglianbelpa Pathian awng, ka thungetna hong za ta'n. Hong ngai ta'n, Jacob ii Pathian awng!

⁹Pathian awng, na tealsa kumpipa kote kumpipa thupha hong piaksak ta'n.

¹⁰Na Biakinn sungah ni khat hun zakna sia leidang mun khat pawpo ah kum tulkhat zak sangin phazaw hi; Mihing seksolte inn sungah ka teen sangin ka Pathian inn kongkha ah ka ding nuamzaw hi.

¹¹TOPA in ei hong sungsia pa le a minthang kumpipa hi a, ama in cikna le minphatna taw eite thupha hong pia hi. A maan a seamte tungah ama in naphate khat zongh a haza bua hi.

¹²Vaanglianbelpa TOPA awng, nang hong muangte in bangza in a lungdam uh ziam!