Read Siyin Chin Psalm Late 85 Bible Online

Psalm Late 85 - Siyin Chin bible

Psalm Late 85

¹TOPA awng, na leitang na hesuak zo hi; nangma in Israel te na nuamsasak kik zo hi.

²Nangma in na mite ii mawnate na maisak zo a, amate ii tatkhialna theampo na pengsak zo hi.

³Amate tungah na thin uukna teng na thaisak zo a, na thin uuk thangsiatna zongh na vei kenkon kik zo hi.

⁴Hong puuapha kik ta'n, Pathian kote ngumpa awng, kote dik nong sak ngawlna thaisak in!

⁵Ko tungah a tawntungin nong thin uuk tu ziam? Na thin uukna thai ngei nawn ngawl tu ziam?

⁶Kote hong thahatsak kik ta'n; tua hile ko na mite in nangma kong pok kik tu uh hi.

⁷TOPA awng, nong itna kip hong lak ta'n, tuaciang nangma ii ngupna le huna kote hong pia ta'n.

⁸TOPA Pathian paunate ka ngai nginge hi; ih mawmawtziate zui kik bua po leang ama in ei a mite tungah kilemna hong kamciam hi.

⁹Ama a upatte hun tu in ama kinging takpi a, ama hong ompuina taw hong huutna in ih ngam ih lei ah kho top tu hi.

¹⁰Itna le thumaanna kisitua tu hi; thutang le kilemna kingawngkoai tu hi.

¹¹Mihingte thumaanna in lei panin van banto tu a, tuaciang Pathian thutang in vantung panin ensuk tu hi.

¹²TOPA in eite hong nuamsasak tu a, ih leitang in anlaak tu tam mama piangsak tu hi.

¹³Thutang suana sia TOPA mai ah pai tu a, ama atu lampi sial khol tu hi.