Read Siyin Chin Psalm Late 89 Bible Online

Psalm Late 89 - Siyin Chin bible

Psalm Late 89

¹ TOPA awng, nong itna kip sia la in ka sa tawntung tu hi; na thumaanna a tawntungin ka thangsak tu hi.

²Na itna in a tawntung atu in kikhomsuan tu ci in ka he a, na thumaanna in van bangin kip hi.

³Nangma in, “Ka teal mihing pa taw thuciamna khat ka vawt zo hi; ka naseampa David tungah kamciam ka pia zo a,

⁴‘Nangma ii suan khat sia kumpi in maang tawntung tu hi; na kumpi khangngui sia a tawntungin kong kepsak tu hi,’ ka ci hi,” na ci hi.

⁵Vantungte in a lamdang na vawtte la in hong sak hi; TOPA awng amate in na thumaanna la in sa uh hi.

⁶TOPA awng vantung ah nang taw a kibang kuama om ngawl hi; vantung mi a minpiang nang taw a kibang kuama om ngawl hi.

⁷Mi thiangthote council kikhopna ah nang hong kikiita hi; amate theampo in nang hong thasia in ding uh hi.

⁸Vaanglianbelpa TOPA Pathian awng, nang za in kuama thahat ngawl hi; TOPA awng na theampo ah nang na thumaan hi.

⁹A thahat tuipi na uk hi; tuasia ii a thin uuk tuihualte na thimsak hi.

¹⁰Nganhingpui Rahab sia na sucip a, na thatlum hi; Na thahatna lianpi taw na ngalte na zothal hi.

¹¹Vantung in nangma aa hi a leitung zongh nangma neisa ma ahi hi; simlei le a sung a om theampo nangma vawt hi.

¹²Saksang le thangsang na bitphua hi; Tabor Mual le Hermon Mualte in lungdam in nangma la hong sak hi.

¹³Bangza in na vaanglian ziam! Bangza in na thahatna lian ziam!

¹⁴Na kumpi ngam sia thumaan le thutang tungah kidoppha hi; itna le thumaanna sia na sep na vawt theampo ii sungah kilangh hi.

¹⁵Lasakna taw nangma hong biate le na dikna khuavak sungah a teangte sia mi lungdamte ahi uh hi.

¹⁶Nangma hangin amate sia sunkhua in lawpna nei uh a, amate in na phatna hu in nang hong pok uh hi.

¹⁷Nangma in zawna lianpite nong pia hi; na itna sungah zawna nong mualsuasak hi.

¹⁸TOPA awng, nangma in kote hong dalpa nong tealsak hi; Israel ii a Thiangtho Pathian awng, nangma in ko atu kumpipa nong pia hi.

¹⁹A thumaan na naseamte tungah taanghlai in mukholna khat na piak sungah, “Ngalkap minthang khat huna ka pia zo hi; mihingte sung pan ka tealsa khat kumpi tokhum ka pia zo hi.

²⁰Ka naseampa David sia sathau thiang noina taw kumpi in ka koi zo hi.

²¹Ka thahatna ama taw om tawntung tu a, ka vaangletna in ama hatsak tu hi.

²²A ngalte in ama zo ngeingawl tu hi; mihing seksolte in ama zo ngawl tu hi.

²³A ngalte ka sucip tu a ama a ensan theampo ka that tu hi.

²⁴Ama ka it tu a, ama tungah ka thumaan tu hi; ngalzo tawntung tu in ama ka siam tu hi.

²⁵Mediterranean panin Euphrates ngun dong a kumpi ngam ka keau tu hi.

²⁶Ama in kei tungah ‘Nangma in ka pa le ka Pathian na hi hi; nangma in kei hong dalpa le hong ngumpa na hi hi’ hong ci tu hi.

²⁷Ama sia ka tapaciil in ka vawt tu a, kumpi theampo sung pan a lianbel hi tu hi.

²⁸Ama tungah ka kamciam ka kholet tu a, ama taw ka thuciamna sia a tawntungin a kikhomsuan tu hi.

²⁹Ama ii kumpi khangngui sia van bangin kip tu hi; ama ii suan khat sia kumpi in maang tawntung tu hi.

³⁰“Ahihang a suan a paalte in ka thukham a ni bua a, ka thupiakte bangin a nungta bua uh le,

³¹amate in ka hilnate a melsia a, ka thupiakte a len bua ahile,

³²amate mawnate huvau in daan ka pia tu hi; amate khialnate huvau in ka thuaksak tu hi.

³³Ahihang David ka itna ka bosak buatu a, ama tungah ka kamciam ka peal buatu hi.

³⁴Ama taw ka thuciamna ka tatsak buatu a, a tungah ka piak ka kamciamsa khat zongh ka dok kik buatu hi.

³⁵“A tawntung atu in khatvei lian, ka min thiangtho taw kamciam ka vawt zo a: David tungah ka leilot ngei buatu hi.

³⁶Ama in suan le paal nei tawntung tu a, ni a taan lai theampo in keima in a kumpi ngam ka etsak tu hi.

³⁷Tuasia in van ah a om thumaan tetti a pang soltha bangin kip tu hi.” na ci hi.

³⁸Ahihang na tealsa kumpipa tungah na thin uuk hi; ama taisan in na nil hi.

³⁹Na naseampa taw na thuciamna sia na tatsak zo a, a kumpilukhu sia buan sungah na vawk zo hi.

⁴⁰Nangma in a khuapi luphungte na sutham zo a a kulhpite a cimh sa in na nusiat hi.

⁴¹Kaantan in a pai po in a neisate nguksak hi; a innpaamte theampo in ama nui san uh hi.

⁴²Ama ngalte sia ngalzawna na pia zo hi; amate theampo a lung na damsak hi.

⁴³Ama ngalhiamte a luithong na suaksak zo a, ngal kidona sungah na lelsak zo hi.

⁴⁴A kumpi ciangkhut na laaksak zo a, a kumpi tokhum sia lei denna in na neizo hi.

⁴⁵A hun ngawlin ama na huaisak zo a, maimawlna taw ama na tuam hi.

⁴⁶TOPA awng, nangma le nangma a tawntungin kiseal tu ni ziam? Na thin uukna bang tanvei mei bangin kuang tu ziam?

⁴⁷Ka nuntakna bangza in tom ziam ci sia hong phawsak ta'n; kote theampo sia a thithei tu a nong bitphua ahi hunlam phawk in!

⁴⁸Akua thi ngeingawlin, nungta thei tu ziam? Mihing in thaankhuk pan bangbangin ama le ama kikeam thei tu ziam?

⁴⁹Topa awng, tu ma sia a, na itna tetti te koisung om ziam? David tung kamciam na vawtte koisung om ziam?

⁵⁰Kei na naseampa hong kilan zazaanna le Pathian he ngawlte hong haamsiatna ka thuakte hong makngilsak heak in.

⁵¹TOPA awng, thaankhuk panin na ngalte in na tealsa kumpipa selno zazaan hi! a paina po ah amate in selno zazaan uh hi.

⁵²A tawntungin TOPA pok vun! Amen! Amen!.