Read Siyin Chin Psalm Late 91 Bible Online

Psalm Late 91 - Siyin Chin bible

Psalm Late 91

¹Ngammuan natu in TOPA kung a pai, akua po ahizong Vaanglianbelpa dalna sungah a om pawpo in

²ama tungah: “Nangma in kei hong hungpa le hong dalpa na hi hi; Nangma in ka Pathian na hi hi; nang sungah muanna kong nei hi,” ci thei hi.

³Ama in a kiseal launa theampo pan le thithei natna theampo panin, nang hong keam tu hi.

⁴Ama in a thakhuite taw nang hong uap tu hi; ama khoina sungah na ngammuang tu hi; Ama thumaanna in nang hong dal tu a, hong hung tu hi.

⁵Zan in launate le sun in thakhat thu in hong sim theite na kiita buatu hi,

⁶ahibuale khuazing sungah hong vaat thei pul natnate ahizong suntangin hong thatlum thei a ngilote ahizong na kiita buatu hi.

⁷Na kungah mihing tulkhat pukin a thi zong, na kiimkot ah tulsawm a thi hialzong nang bangma hong kilaw ngawl tu hi.

⁸A seksolte daan a kipiakzia en in, na mu tu hi.

⁹Nangma in TOPA sia nang hong hungpa in na nei zo a, a Saangbelpa sia nang hong sungsia pa in na nei zo hi,

¹⁰tua ahikom siatna khat pawpo in nang hong vaat ngawl tu a, na inn nai ah ngoltolna hong theng ngawl tu hi.

¹¹Pathian in a vantunglalangte nang hong cing tu, na paina po ah hong dal tu in tavaw tu hi.

¹²Na peang in suang sui tha in na liam ngawl natu, amate in a khut taw nang hong dom tu hi.

¹³Tawpite le ngulte, a kiitak huai tawpite le ngul nguu neite na tuanhcil tu hi.

¹⁴Pathian in, “Kei hong itte ka hun tu a, TOPA a hong saangte ka hung tu hi.

¹⁵Kei hong biapui ciangin amate ka zo tu hi; ngim a nga ciangin amate taw ka omkhawm tu hi. Amate ka suatak tu a, ka upat tu hi.

¹⁶Amate sia khansauna tel ka pia tu a, amate ka ngum tu hi,” ci hi.