Read Siyin Chin Psalm Late 92 Bible Online

Psalm Late 92 - Siyin Chin bible

Psalm Late 92

¹TOPA awng, nang tungah lungdamko tu le Saang Bel Pathian awng, nangma upatna la sak tu sia bangza in pha ziam,

²zing simin tatsat ngawl na itna thangsak tu, zan simin na thumaanna pualaak tu le

³khau taw a kithua tum theite le tengtongh taw music hoite tumin lungdamkona sia bangza in pha ziam.

⁴TOPA awng, a lian mama na sepnate in kei hong lungdamsak hi; na sepsa na vawtsate hu in lawpin la ka sa hi.

⁵TOPA awng, na tuk na diannate bangza in lian ziam! Na ngaisutnate bangza in thuk ziam!

⁶Hi thu in mihing mawmaw khat ii heak zawk hi ngawl hi; a nangh khat in tel zo ngawl hi:

⁷a seksolte sia lopa bangin po thei tu a, a maan ngawlin a seamte nuamsa thei tu hi; ahitazong amate kilalcipsak tu hi,

⁸banghang ziam cile TOPA awng, nang sia a tawntungin a lianbel na hi hi.

⁹Na ngalte thi tu hi ci in ka he uh a, a seksol theampo kizothal tu hi.

¹⁰Ngam khuital bangin nong hatsak zo hi; lungdamna taw thupha nong pia zo hi.

¹¹Ka ngalte ngallelna ka mu zo a, a seksolte ii kaanate ka za zo hi.

¹²Thutangte palm kungte bangin limci tu hi; amate Lebanon ah Cedar thingkungte bangin khang tu hi.

¹³Amate sia TOPA inn sungah a kisuan, ih Pathian Biakinnpi sungah a palh,

¹⁴haam napi nga a nga lai, a tawntung a hing, a kho thingkungte bang ahi hi.

¹⁵Hisia in TOPA thumaan a, kei hong hungpa sia khial ngawl hi ci in lak hi.