Read Siyin Chin Psalm Late 94 Bible Online

Psalm Late 94 - Siyin Chin bible

Psalm Late 94

¹TOPA awng, nangma in daan a pia Pathian na hi hi; na thin uukna kilanghsak in!

²Nang sia mihing theampo ii thukhenpa na hi hi; hong tho ta'n a, a kiphasakte amate taw a kiphu bangin daan na pia in!

³Mihing seksolte bang tanvei lungdam lai tu ziam? TOPA awng, bang tan khuangei lai tu ziam?

⁴Khialna lian neite bang tanvei kiphasak lai tu a, amate khialna liante tungah bang tanvei kisuangtaak lai tu ziam?

⁵TOPA awng, amate in na mite sucip hi; amate in nangma ii mite nengcip hi.

⁶Amate in meingong tangate thatlum uh a, ih ngam sungah a teang khualmite suamlum uh hi.

⁷Amate in, “TOPA in ei hong mu ngawl hi; Israel te ii Pathian in hong phawk ngawl hi,” ci uh hi.

⁸Ka mite awng, bangbangin tuaza dongin mawmaw in ngoai thei nu ziam? Bang hun ciangin tel tu nu ziam?

⁹Eite bil a vawt Pathian in za thei ngawl tu ziam? Eite mittang a vawt Pathian in mu thei ngawl tu ziam?

¹⁰Minamte a hil a pau pa in amate daan pia ngawl tu ziam? Mihing theampo ii syapa ahi ama in pilna nei ngawl ziam?

¹¹Amate ngaisut sia TOPA in he hi; Amate khua ngaisutna telmeal a om ngawlzia ama in he hi.

¹²TOPA awng, nangma ii na lamlakte, nangma ii na thukham na hil mite in bangza a lungdamte ahi ziam!

¹³Mihing seksolte mat natu in vuum a kitaw dong nangma in ama sia ngimna hunte pan na ommuangsak hi.

¹⁴TOPA in a mite nusia ngawl tu hi; ama ii neisa mihingte taisan ngawl tu hi.

¹⁵Thukhenzumte ah thutang khenna hong piang kik tu a, a thutang mihing theampo in tua thutang khenna panpui tu hi.

¹⁶Mihing seksolte langpanin kei atu akua ding ziam? Siatna a vawtte langpanin kei sangah akua hong pang ziam?

¹⁷TOPA in hong hu ngawl hi ka pole a thimthuna ngam, a manlang tak ka zot zawk ngei zo tu hi.

¹⁸“Kei ka liik laitak hi” ka ci hi; ahihang TOPA awng, nong itna kip in hong khuangkhosak hi.

¹⁹Thintoi a ka thin a ngim simin, nangma in nong heeneam a nong lungdamsak hi.

²⁰Sumnguk ne thei thukhenmangte, a khaikim ngawl thu, thutak a suate,

²¹Mihing phate a thasawmte a maw ngawl khat thidaan a piate sia nang taw a kipawl thei bua uh hi.

²²Ahihang TOPA in kei hong hung hi; ka Pathian in kei hong dal hi.

²³Ama in amate ngitlo hu in daan pia tu a, a mawnate hu in susia tu hi; TOPA ih Pathian in amate lalcipsak tu hi.