Read Siyin Chin Psalm Late 96 Bible Online

Psalm Late 96 - Siyin Chin bible

Psalm Late 96

¹TOPA tungah la thak khat sa vun! Leitung theampo awng, TOPA tungah lasa vun!

²TOPA tungah lasa vun a, ama pok vun! Ama ii eite hong ngupna lungdamna thupha ni simin thangsak vun.

³Ama ii minthanna minamte tungah thangsak vun, ama ii a vaanglian nasep nate mihing theampo tungah thangsak vun.

⁴TOPA sia lian a, nasia tatakin pok tu ahi hi; pathian dang theampo sangin ama vaang piak zawk tu ahi hi.

⁵Minam dangte theampo ii pathiante sia milim hi lel bek hi, ahihang TOPA in vantungte bitphua hi.

⁶Minthanna le vaangletna in ama kiim uum hi; a Biakinnpi sia vaangletna le hoina taw kidim hi.

⁷leitung mihing theampo awng, TOPA pok vun. A minthanna le a thahatna pok vun.

⁸TOPA ii a minthang a min pok vun; biakpiakna khat kengin ama Biakinnpi sungah pai vun.

⁹A thiangtho Pa hong kilangh ciangin ama mai ah kun vun; leitung bup awng ama mai ah liingin om vun!

¹⁰Minam theampo munah “TOPA in kumpipa hi! Simlei sia kho takin kiphut a kikhiin thei ngawl hi; ama in mihingte thukhaikim taw thu tan tu hi” ci vun.

¹¹Lei le van awng, lungdam vun! Tuipi awng, na sungah a om nuntakna nei teng taw hawk vun;

¹²lote awng na sungah a om teng taw lungdam vun! Taam sungah a om thingkungte in

¹³leitung uk tu in TOPA hong pai ciang, lungdam in au tu uh hi. Ama in leitung mite sia thukhaikim taw a pha in a uk tu hi.