Read Siyin Chin Paunakte 1 Bible Online

Paunakte 1 - Siyin Chin bible

Paunakte 1

¹Israel kumpipa David tapa Solomon ii paunakte ahi hi.

²Hisung a paunakte in ciimna le ngaisutpha khentel natu le a khiakna thuk kamtepteete tel natu in hong hu tu hi.

³Tuate in pilvangna taw bangbangin nungta tu, bangbangin thumaan tu a, thutang tu, thukhual tu ci in nang hong hil thei tu hi.

⁴Tuate in heakna a nei ngawl lai khat pilsak thei tu a, tuaciang in khangnote kicinna a nei thei natu dan hil hi.

⁵Hi paunakte in a ciimte ii heakna ngawngawn belap thei a, pilna saang a neite lamlak hi,

⁶tuasia ciangin amate in paunakte ii a kiseal khiaknate he thei tu a, mihing ciimte dok thu telhakte zongh tel thei tu uh hi.

⁷Heakna na nei natu in TOPA thasiana na nei phot kul hi. Mihing mawmawte in ciimna awlmawk ngawlin kan nuam ngawl hi.

⁸Na pa le na nu hong sonte pha takin nadon in, ka tapa awng.

⁹Amate hong hilnate in a et hoi dial khat, khi khat ii na meal hong hoi tuamsak bangin na pianzia hong etlawmsak tu hi.

¹⁰Ka tapa awng, mimawte hong ze et ciangin zui heak in.

¹¹A zezen in, amate in “Hong pai ta'n; ih thalup tu khat zong ka tawng! Mawna nei ngawl khat cimthoina in ngalvawt sin ve tawng!

¹²Amate ih mu tangin nungta a, ciidam hikale amate tungah ih law nop teng ih man zawkciang thi siat tu hi!

¹³Hauna namcin le ih innte sia ih sutol vanhte taw a kidim in ih mu tu hi!

¹⁴Hong pai ta'n a hong pawm ta'n, ih nguk theampo ih hawm tek tu hi,” hong ci tu hi.

¹⁵Ka tapa awng, mihing tuabangte taw kithawl heak in. Amate kung pan kiheam in.

¹⁶Amate in a sia khat a vawt tu ngakla hi. Amate in thatlum tu in kinging tawntung hi.

¹⁷Na mat nop vacim sia ii mu tangin thaang nasia hang, bangma phatuam ngawl hi,

¹⁸ahihang mihing tuabangte in amate le amate thaang kisia uh a, tua thaang sungah amate thi tu uh hi.

¹⁹Mihing suamna in a suamte nuntakna siik kik vaciat hi, ngoltolna taw a nungta khat pawpo tungah tuabang ma in tung hi.

²⁰Ngai in! Ciimna in khuapi lampi liante sung le vanhzuakna phual ah hong sam hi,

²¹khuapi kongpite le mihingte kisiktuana munte ah a nging tatakin hong sam hi:

²²“Mihing mawmawte awng! bang tanvei mawmaw nuam nu ziam? Heakna bang tanvei ciammui vawt tu nu ziam? Heak tu sawm nawn ngawl nu ziam?

²³Kong teih ciangin hong ngai tavun; ngaisutna pha kong pia tu a, ka heaknate kong hawm tu hi.

²⁴Hong sasam khi hi, hong pai tavun ci in hong thaw khi hi, ahihang hong ngai nuam ngawl nu hi. Kei sia hong nadon nuam ngawl nu hi.

²⁵Ngaisutna kong piak theampo thusim ngawl nu hi, kong hil kong pau tu zongh nong oai ngei bua uh hi.

²⁶Tua ahikom ngim na nga ciang, kong nuisan tu hi. Launa lian tatakin nang hong nawk a,

²⁷na tungah vuipi suangval bangin hong va a, ngimna vuipi hong puak hi, nang sia natna le cimawkna taw na om hun ciangin kong nunau tu hi.

²⁸Tuaciang ciimna nong kan tu a, ahihang kong zo buatu hi. Mun theampo ah hong zong ka lete zong nong mu buatu hi.

²⁹Heakna bangma hunin na thusim ngei bua a TOPA thu nit tu zongh na nial tawntung hi.

³⁰Ngaisutna kong piakte na dei ngei bua a, kong hil kong pau ciangin nong nadon bua hi.

³¹Tua ahikom, nangma taw a kiphu bangin na nga tu hi, tuaciang nangma ngamtatna ma in na ci hong nasak tu hi.

³²Heakna nei ngeingawlte thi hi, banghang ziam cile amate in ciimna nial uh hi. A mawmawte sia awlmawk a neithei ngawlna in amate lalsak hi.

³³Ahihang a kuama po kei thu hong ngaite in ngammuanna nei tu hi. Ama sia thinmuang in om tu a, a launa tu bangma thu a om buatu hi.”