Read Siyin Chin Paunakte 10 Bible Online

Paunakte 10 - Siyin Chin bible

Paunakte 10

¹Hite sia Solomon ii paunakte ahi hi: Tapa ciim in a pa angtangsak a; a mawmaw sia in a nu khuangaisak hi.

²Thumaan ngawlna taw na nga hauna in bangma phattuamna hong pia ngawl tu hi, ahihang thumaanna in na nuntakna hong ngum thei hi.

³TOPA in mihing phate ngilkialsak ngawl tu hi; ahihang a seksolte sia amate ii deite a ngasak buatu hi.

⁴Dathamna in zawnna piangsak tu a, ahizong nasep hatna in hong hausak tu hi.

⁵Mihing khuangaisun thei khat in a hunlai in lo ante kaikhawm hi; anlaak hun sung teng mutna in mindaina hi.

⁶Mihing pha khat in thupha saang tu hi. Mihing seksol khat ii kammalte in a ngoltol pianzia phualseal hi.

⁷Mihing phate sia thupha saanna hi ci in kiciamtee tu hi, ahihang mihing seksolte sia kimangil pal tu hi.

⁸Mihing khuangaisun theite in ngaisut pha piakna saang thei hi. Mawmawt kam a pau mite sia siatna sung theng tu hi.

⁹Thumaan mihingte thinmuang hiithiat a, ahizong thumaan ngawlte mat thuak tu hi.

¹⁰Thumaan thutak a iim te in buaina piangsak a, ahizong phualseal ngawlin a son ngamte in kilem natu in naseam ahi uh hi.

¹¹Mihing pha khat ii kampaute in nuntakna tuinaak hi a, ahizong a seksol khat ii kammal in a ngoltol pianzia phualseal hi.

¹²Ki etsatna in buaina thawn a, ahizong itna in tatkhialna theampo maisak hi.

¹³Mihing a pilte in khiakna nei in pau a, ahizong a mawmawte daan piak kul hi.

¹⁴A ciimte in heakna a nga thei za in la a, ahizong mihing mawmawte hong pau ciang buaina taw kinai hi.

¹⁵Hauna in a haute hung a; zawnna in a zawngte susia hi.

¹⁶Nasep pha sepna thaman in nuntakna hi a, ahizong mawna in mawna dang tamzaw lai sung hong then hi.

¹⁷Kihil kipau ciangin a ngai mihingte nungta tu a, ahizong amate khialna a pualaak nuam ngawlte atu in lauhuai hi.

¹⁸Mihing khat ama ii etsatna a phualseal sia in leilot pa ahi hi. Thu nawnsan a kizelsak sia in mihing mawmaw ahi hi.

¹⁹Kam tam pau vaial lete mawna vawt vaial hi thei tha tu ni hi. Mihing ciim na hile pau ngawlin om khipkhep tu ni hi.

²⁰Mihing pha khat ii kammalte in ngunn ciitak bang hi a, a seksol khat ii ngaisutnate in man nei ngawl hi.

²¹Mihing pha khat ii kammalte in mihing tam mama phattuamna pia tu a, ahizong nangma le nangma sia mawmawtna taw na kithatlum thei tu hi.

²²Nang hong hausak sia in TOPA ii thupha ahi hi. Nasep hanciamna in hong hauzawsak thei ngawl hi.

²³A maan ngawl sep diksakna sia mawmawtna hi. Mihing pilte in ciimna sungah nuamsa uh hi.

²⁴A thutangte in amate deite nga a, ahizong a seksolte in a kiitakbel teng nga tu hi.

²⁵Vuipi suangval hong pai in a seksolte seamkeak a, ahizong mihing thumaante a tawntung suakta hi.

²⁶Bangma hunin mihing datham pa khat in nang atu bangma seamsak ngei heak in; ama sia na ha le zuhau a kilem ngawl bang ahibuale na mittang sungah meikhu bangin hong nuammawsak tu hi.

²⁷TOPA thu ni lete na khansauzaw tu hi. Mihing seksolte sia thi hun ngawlin khanthi uh hi.

²⁸Mihing phate ii lametnate in thinnopna sung hong then a, ahizong mihing seksolte in mai sangah lamet tu bangma a nei thei bua uh hi.

²⁹TOPA in thumaan mihingte sungsia hi; ahizong a ngamta khialte susia hi.

³⁰A thutang mite in ngammuanna nei tawntung tu a, ahizong mihing seksolte a ngam sungah a nungta buatu hi.

³¹A thutang mihingte in ciimkam pau uh a, ahizong kamsia a pau leei sia kitawlngasak tu hi.

³²A thutang mihingte in a dik thute pau tu he a, ahihang a seksolte in ngual thin nat natu bek pau nithi uh hi.