Read Siyin Chin Paunakte 11 Bible Online

Paunakte 11 - Siyin Chin bible

Paunakte 11

¹TOPA in khaikhin maan ngawl a zanghte ensan hi. Toaisuang maante hangin ama lungdam hi.

²Mihing kiphasak te hai ngawlin maimawl tu hi. Kiniamkhiakna sia ciimna hizaw hi.

³Mihing pha na hile thumaanna in lam hong lak hi. Mihing a muanhuai ngawlte sia amate thumaan ngawlna in susia hi.

⁴Na thi ni hong thet ciang haunate in bangma phattuamna hong pia zo ngawl tu hi, ahihang thumaanna in na nuntakna hong ngum thei hi.

⁵Thumaanna in mihing pha khat ii nuntakna olsak zaw hi, ahihang mihing seksol khat in ama puk natu ama mama in piangsak tu hi.

⁶Thutang hina in a thumaante suatak hi, ahihang a muanhuai ngawlte sia amate duhopna thaang sungah awk hi.

⁷Mihing seksol khat a thi ciangin ama lametna zongh ama taw thi khawm hi. Haunate sungah thinmuanna sia bangma ahi bua hi.

⁸A thutangte sia ngimna pan kidal hi; a seksolte tungah ngimna tung zaw hi.

⁹Pathian sel mihingte thu sonna in nang hong lalsak thei a, ahizong thutangte ciimna in nang hong hun thei hi.

¹⁰A thumaante in hamphatna a nei uh ciangin khuapi sungah lungdamna om a, a seksolte a thi uh ciang lungdamna aw nging hi.

¹¹A thutangte ii thupha a piak uh ciangin khuapi khat sia khua thupi suak hi; ahihang khuapi khat sia a seksolte kammalte taw kilalsak hi.

¹²Ngual zawnsak kampauna in mawmawtna hi. Khuangaisun thei khat na hile na thim khipkhep tu hi.

¹³Thu nawnsan son khat sia thuku huvau ah kimuang thei ngawl hi, ahihang a muan taak khat sia na muang thei hi.

¹⁴Lampuina a nei ngawl minam khat sia puk tu hi. Ngaisutna a pia thei tam mama a om le ngammuanna om hi.

¹⁵Khualmi khat ii leiba losak tu in kamciam na pia le na kisiik tu hi. Kamkumh bua lete nangma atu in phazaw hi.

¹⁶A thuthiam numei khat kizakta a, ahizong ngamtat pha ngawl numei khat sia a maizum huai khat ahi hi. A datham mihing khat in sum a nei ngei buatu a, ahihang a hanciam mama khat sia hau tu hi.

¹⁷Na dik le nangma le nangma kiphatvawt na hi hi. na ngilo le nangma le nangma kiliamsua na hi bek hi.

¹⁸Mihing seksolte in a tatakin bangma meetna a nga bua hi, ahihang a maan in na ngamta le thaman hong kipia takpi tu hi.

¹⁹A maan a, ngamta tu khensatna a nei sia nungta tu hi, ahihang akua po ahizong a maan ngawl ngamtatna a vawt hamtang sia thi tu hi.

²⁰TOPA in mihing thinsiate ngaimaw hi, ahizong a maan a ngamtate it hi.

²¹Mihing ngilote daan kipia tu ci sia a pealmaw hi, ahihang thutang mite ahile suakta tu hi.

²²Thu khensatna pha a nei ngawl numei khat ii mealphatna in vok naak ah khamh naakba taw kibang hi.

²³Mihing phate ii deite sia phatna taw tawp tawntung hi; mihing seksolte ii a deite a nga uh ciang a kuama po thin uuk hi.

²⁴Mihing pawlkhat sia a sum uh zangh vapeak a hau vaial hi. A dangte sia kidawm in zangh hi napi zawng vaial hi.

²⁵Ngo vapeak vun, tua hile na nuamsa tu uh hi. Ngual hu vun, no zongh hong kihu tu hi.

²⁶A man khan tu ngak a, antang a kholte sia mihingte in haamsiat hi, ahihang tuabang khol ngawlin a zuak paihte sia ngual in pok hi.

²⁷Na mungtupnate a pha le nang hong kizakta tu hi, ahihang ngimna na zong le tuasia ma na nga tu hi.

²⁸A hauna uh a suangte in tangngam lai a, thingteete bangin a pul tu uh hi, ahihang thutangte in khaal lai a, thingteete bangin a khang tu uh hi.

²⁹Amate ii bangkuate sungah ngimna a piangsakte in a tawpna ah bangma a nei buatu uh hi. Mi mawmawte sia miciimte ii naseam a suak tawntung tu uh hi.

³⁰Thutang in nuntakna pia a, ahihang ngoltolna in nuntakna bosak hi.

³¹Mihing phate hi leitung ah thaman kipia ahiciang mihing seksolte le mimawte daan kipia tu hi ci sia na he hamtang tu hi.