Read Siyin Chin Paunakte 12 Bible Online

Paunakte 12 - Siyin Chin bible

Paunakte 12

¹A kuama po heakna a deite in a khial ciangin hil tu uuk hi. Kihil kipau tu dei ngawlna in mawmawtna hi.

²TOPA in mihing phate tungah lungkim a, ahizong siatna a ngealte puavawk hi.

³Seksol tatsiatna in thinmuanna pia ngawl a, ahizong mihing thutangte in dinmun kip nei hi.

⁴Zi pha khat in a pasal ii angtanna le lungdamna ahi hi; ahihang a pasal a maizumsak zi khat in a pasal ii ngu sungah cancer natna khat taw kibang ahi hi.

⁵A thumaan mihingte in a kilawm bangin hong vawt tu hi; mihing seksolte in theam tu bek hong sawm hi.

⁶Mihing seksolte ii kammalte in mihing thatlum thei a, ahihang a thutangte ii kammalte in tawnna a thuakte suatak hi.

⁷Mihing seksolte in kiamsukin suan le paal nei ngawl a, ahihang thutangte ii bangkuate sia nungta paisuak hi.

⁸Na pil le, nang hong kipok tu hi; na mawmaw le nang hong kinomu tu hi.

⁹Milian khat bang kiheang in ngilkial a ih om sangin nuntak natu a thalaw mihing thawthong khat hi leang phazaw hi.

¹⁰Mihing pha khat in a ngannote pha takin en a, ahihang mihing seksolte in nganno tungah tatkha hi.

¹¹Nasep hanciam lotho mi khat in neak tu tam mama nei hi, ahihang kimanna om ngawl nasepnate taw hun bosakna in mawmawtna hi.

¹²Mihing seksolte ii uuk theampo sia, a sia vawt tu zonna ahi hi, ahihang thutangte a dinmun kho hi.

¹³Mihing seksolte khat in ama ii pauna taw thaang sungah awk hi, ahihang a thumaan khat in ama le ama ngimna pan kipusua hi.

¹⁴Na thaman sia na pauna le na sepna tung pan kituat tu hi; nang taw a kiphu bang na nga tu hi.

¹⁵Mihing mawmawte in amate le amate maan kisa tawntung hi. Mihing ciimte in ngaisut piakna ngai hi.

¹⁶A mawmaw khat in diksak ngawlna a nei ciang manlang takin kilanghsak hi. Mihing khuangaisun theite in ngual ii lanna kam a awlmaw buatu hi.

¹⁷Thumaan na son ciangin thutang khenna piang hi; ahihang leilotna in a kikhaikim ngawl thukhenna piangsak hi.

¹⁸Ngaisun phot ngawl a, pauna in namsau taw saat bangin thuk bunin liamsak thei hi, ahihang ciim kampauna in damsak thei hi.

¹⁹Leilot thu sia ngei kho ngawl a, thumaan thutak sia a tawntungin nungta hi.

²⁰Siatna a ngealte in muanmawk ngawl thusia khat tawk tu a, ahihang phatna a seamte in lungdamna nga tu hi.

²¹Thutang mite tungah a sia na khat zongh tung ngawl hi, ahihang a seksolte in ngimna simngawl bangma a nei bua uh hi.

²²TOPA in leilot theite ensan hi, ahihang a kampau sa a kholette diksa hi.

²³Mihing khuangaisun theite in a heak uh thute son vazai ngawl hi, ahihang mihing mawmawte in a heak ngawlna uh teng ma thangsak hi.

²⁴Nasep hamciamna in thahatna hong pia tu hi; na dathamna in sal hong sua tu hi.

²⁵Thinngimna in lungdamna hong suttol thei hi, ahihang kamthiam in hong lungpilsak tu hi.

²⁶A thutang pa sia a lawm pa atu in lamhilpa hi tu a, ahihang a seksol khat ii lampi in amate lam pialpui hi.

²⁷Na da a tham le na zon sia na nga ngei buatu a, ahizong nasep na hanciam le hauna na nga tu hi.

²⁸Thutang hina in nuntakna lampi hi; seksolna sia thina lampi ahi hi.