Read Siyin Chin Paunakte 13 Bible Online

Paunakte 13 - Siyin Chin bible

Paunakte 13

¹Tapa ciim khat in a pa ii a hil a pau ciangin nadon a, ahihang a kisathei mihing khat in khial khi hi a ci ngei bua hi.

²Mihing phate sia amate pauna tung panin thaman kipia tu a, ahihang ngualtheam theite sia andu ngilkial bangin ngoltol ngamtatna dei hi.

³Na pau po kidawm in a, na nuntakna huu in. Kidawm ngawlin a pau khat in ama le ama kisiatsua hi.

⁴A datham khat in na khat pawpo bangza in a dei hang, a nga ngei buatu hi. Naseam hat khat in a dei po nga tu hi.

⁵Mihing thumaante in leilot thute ngaimaw hi, ahihang mihing seksolte ii kammal in maizumhuai a, minpaan huai hi.

⁶Thutang hina in a maw ngawlte hung hi; seksolna in mawneite ii pukna hi.

⁷Mihing pawlkhat sia a hau bangin kiheang ahihang, bangma a nei bua uh hi. A dang pawlkhat sia a zawng bangin kiheang ahihang, nei le lamh a nei uh hi.

⁸Sumhau khat in a nuntakna a huuk natu in a sum a zak kul a, ahihang a zawng khat sia ama a tawng tu kuama a om bua hi.

⁹Thutangte sia khuavak taang kiukiau khat taw kibang hi; a seksolte sia meiinn a mit vangeu taw kibang hi.

¹⁰Kisak theina in ngim ngana simngawl bangma dang a piangsak bua hi. Ngaisutna ngetna in ciim zawkna hi.

¹¹Ol takin hauna na nga le na bosak pal tu hi. A haksa zaw in na thalaw le a tamzaw na nei tu hi.

¹²Lametna a bo ciang ngaisutna zongh lal a, ahihang na uukna khat a taangtun ciang thinnopna taw hong kidimsak hi.

¹³Ngaisutna phate na nial le ngimna a zong na hi hi; tuasia zui lete na ngammuang tu hi.

¹⁴A ciimte hong hilnate sia nuntakna ii tuinaak hi; tuate in launa sungah na om ciang hong suaktasak tu hi.

¹⁵Pilna in kithasiana piangsak a, ahihang a muanhuai ngawlte sia lalna lampi a tawn uh hi.

¹⁶Khuangaisun thei mihingte in a ngamtat ma in ngaisun phot tawntung hi, ahihang mihing mawmawte in a heak ngawlna uh thangsak hi.

¹⁷A muan thamman ngawl kamtaite in ngimna piangsak hi, ahihang a muanhuaite in kilemna hong then hi.

¹⁸Kihilna a ni nuam ngawl po sia zawngin mindai tu hi. A kuama po kihil kipauna a ngai sia kizakta hi.

¹⁹Na dei po na nga tu sia bangza in pha ziam! Mihing mawmawte in siatna nusia nuam ngawl hi.

²⁰A ciimte taw na kithawl le na ciim tu hi. Mihing mawmawte taw na kipawl le na lal tu hi.

²¹Ngimna in mawneite mun theampo ah zuizen a, ahihang mihing thutangte sia a thaman in naphate kipia tu hi.

²²Mihing pha khat in a tute atu hauna nusiat tu hi, ahihang mawneite hauna sia thutangte kung zuan tu hi.

²³A kitho ngawl lote in mizawngte atu, an tam mama piangsak thei hi, ahihang a maanin a ngamta ngawlte in mizawngte thaw tu khaktan hi.

²⁴Na tapa na hilna in daan na pia buale ama a it ngawl na hi hi. Ama na it nale hil in.

²⁵Thutangte in a neak tu a kicing nei a, ahihang a seksolte sia a ngil uh kial tawntung hi.