Read Siyin Chin Paunakte 15 Bible Online

Paunakte 15 - Siyin Chin bible

Paunakte 15

¹Awneam taw kizona in thin uukna thaisak a, ahihang awtawlok in thinsosak hi.

²Mihing ciimte a pau uh ciang heakna deihuaisak a, ahihang mihing mawmawte in nawnsan thu son nuam uh hi.

³TOPA in mun theampo ah bang teng piang ci in mu hi; na pha ih seam a, a sia ih seam zong ama in hong en nginge hi.

⁴Kamthiam in nuntakna piangsak a, ahihang ngitlo kampauna in na thin hong siasak hi.

⁵Na pa hong hilnate na awlmawk ngawl tu sia mawmawthuai hi; ama ii hong hilna hong paunate saan theina in ciimna ahi hi.

⁶A thutang mihingte in a hauna uh keamcing hi, ahihang mihing seksolte in hun haksa hong thet ciang a neisate bosua uh hi.

⁷Heakna sia mihing a ciimte in kizelsak a, mihing mawmawte ii kizelsak hi ngawl hi.

⁸Mihing phate thunget ciang TOPA lungkim hi; ahihang mihing seksolte hong paipui sa ngaw biakpiaknate ensan hi.

⁹TOPA in mihing ngilote ngamtatziate ensan hi, ahihang a maan a seamte it hi.

¹⁰A maan ngawl sep na nei le nasia takin daan hong kipia tu hi; kipuuaphat tu na uuk buale na thi tu hi.

¹¹Mithi khua ngawngawn in, tua munah bang om ziam ci in TOPA ii heak tu sia khaam thei ngawl hi; tua ahile bangbangin mihingte in amate khua ngaisutna sia Pathian mai ah seal thei tu ziam?

¹²A kisathei mihingte in kipau kihil tu a uuk bua uh hi; a ciimzawte tung panin ngaisutna a ngen ngei bua hi.

¹³Mihingte sia a lungdam uh ciangin maitui uh a, ahihang a hee uh ciangin thinkiamna maipuak nei uh hi.

¹⁴Mihing pilvangte in he thua nuam hi, ahizong a nanghte in heak ngawlna taw lungkim uh hi.

¹⁵Mizawng khat ii nuntakna sia a tawntung thasaalin dianna hi a, ahihang mihing lungdamte in a nuntak nuamsa tawntung uh hi.

¹⁶Hau a ngim nga tu sangin, zawng a TOPA kiitakna in phazaw hi.

¹⁷Ki etsatna a omna munah sa a limbel neak sangin na it mihingte taw antee neak khop sia phazaw hi.

¹⁸Thinngeamna in kam kinialna piangsak a, ahihang thinsauna in kilemna hong puak hi.

¹⁹Na da a tham le mun theampo ah haksatna na thuak tu a, ahihang na thumaan le ngim na nga buatu hi.

²⁰Ta ciimte in a pate lungdamsak hi. A mawmawte bek in a nute maimawlsak hi.

²¹Mihing ciim ngawlte in a mawmawtna taw lungdam uh hi, ahihang a ciimte in a maan sia bek seam tu hi.

²²Ngaisut piakna na nga thei theampo la lete zawna na nga tu hi; tua ngawl taw zawna na nga buatu hi.

²³A hun taw a kilawm a kiphu tu kammal zak thei sia bangza in thinnopna om ziam!

²⁴Mihing ciimte in nuntakna lampi ah paito uh a, thina lampi a tawnsuk bua uh hi.

²⁵A kisathei mite ii bangkua sia TOPA in susia tu a, ahihang ama in meingong khat ii neisa sia a huu tu hi.

²⁶TOPA in ngitlo ngaisutnate ngaimaw hi; ahihang ama in kamthiamte diksa hi.

²⁷Thumaan ngawlin meetna nga tu na sawm le na innkuan in ngimna sung na theng tu hi. Sumnguk ne heak in tua hile na khansauzaw tu hi.

²⁸Mihing phate in ngual kam a zo ma in ngaisun masa uh hi. Mihing ngilote in manlang takin zo kik a, ahihang buaina piangsak hi.

²⁹Mihing phate thu a nget ciang TOPA in ngai hi, ahihang ama in a ngilote a awlmawk bua hi.

³⁰A maitaite in nang hong lungdamsak hi, tuaciang lungdamhuai thute in na thin hong nuamzawsak hi.

³¹Nang hong kihil hong kipau ciangin na nadon le a ciim na hi hi.

³²Heak nopna na nei buale nangma le nangma kisiatvawt na hi hi. Kipau kitekna na saang thei le na ciim seseam tu hi.

³³TOPA thasiana in pilna heakna khat ahi hi. Patoaina na saan thei ma in na kiniamkhiak masak kul tu hi.