Read Siyin Chin Paunakte 16 Bible Online

Paunakte 16 - Siyin Chin bible

Paunakte 16

¹Eite in tupna sawmna vawt ka leang Pathian ii deina bang bekin taangtung hi.

²Na sep na vawt theampo maan hi ci in ngaisun tha tu ni hi, ahihang TOPA in na tupna laingil tungah thu hong khen hi.

³Na ngealnate TOPA in thupha hong piak natu in ngen in, tua hile na sep tak ciang zawna taw, ma na tun tu hi.

⁴TOPA vawt sa khat simin a tawp natu khat tek om hi; a seksolte tawp natu sia lalna ahi hi.

⁵A kisathei pawpo TOPA in ensan hi; ama in amate daan thuak natu panin a suaktasak buatu hi.

⁶Thumaan vun a, citak vun, Pathian in na mawna hong maisak tu hi. TOPA ii thu ni vun, thusia bangma na tungah hong tung ngawl tu hi.

⁷TOPA na lungkimsak ciangin na ngalte zongh lawm le ngual na suaksak thei tu hi.

⁸Thumaan ngawlna taw sum tam mama nga sangin thumaan takin thalaw vateeina taw sum tawmno khat nei sia phazaw hi.

⁹Nangma in ngealna vawt thei tu na hihang Pathian in na ngamtatnate hong zeak hi.

¹⁰Kumpipa in Pathian ii thuneisakna taw pau hi; ama thukhennate sia maan tawntung hi.

¹¹TOPA in toaisuangte le khaikhin a maan tu dei a, vanhzuak theampo a kilawm in zuak tu dei hi.

¹²Kumpipate in ngitlona dual zo ngawl hi, banghang ziam cile a khaikim thukhenna in kumpi khat thahatsak hi.

¹³Kumpipa khat in thumaan thutak za nuam a, thumaan a sonte ama in maipha pia tu hi.

¹⁴Mihing ciim khat in kumpipa lungdam in a om thei natu hanciam tu hi; kumpipa a thin a uuk le khat po in thi law thei hi.

¹⁵Kumpipa ii maipha a piakte sia khuakhaal kipat hun a, nguazusak meeikaaite bang ahi hi. Tuasung ah nuntakna om hi.

¹⁶Khamh le ngunn sangin ciimna le heakna nei tu phazaw hi — phazaw pek hi.

¹⁷Miphate in siatna a pial lampi tawn in khualhaw hi; tua ahikom na pai natu en in kidawm ta'n — tua in na nuntakna hong hun thei tu hi.

¹⁸Kiphatsakna in siatna sungah hong then a, kisaktheina in kiamsukna sung hong then hi.

¹⁹A kisatheite ii sungah kihel a, ih pawlte ii a sutol vanh hawmte ih nga sangin, kiniamkhiakin a zawngin om leang phazaw hi.

²⁰Nang hong kihilnate nadon in tua hile zawna na nga tu hi; TOPA muang lete na lungdam tu hi.

²¹A ciim a puicing mihing khat sia ama ii tel theina a neina pan kihe hi. Ama sia kamthum pau vaial a, ngual huai vaial hi.

²²A ciimte atu in ciimna sia nuntakna tuinaak ahi hi, ahihang mihing mawmawte pilsak tu hanciamna sia hun bo thawthong hi.

²³Mihing pilvangte in a pau ma in ngaisun khol uh hi; tuasia ciang amate pauna sia ngual zaak nop suak seseam hi.

²⁴Kamthiam paunate sia khuaitui bangin thum a, ciidam natu in pha hi.

²⁵A maan lampi hi ci in na up sia in thina sung hong then thei hi.

²⁶Nasep haksa seam khat ii ankam limna in a nasep hatsak zaw hi, banghang ziam cile ama in a ngilvasak nuam hi.

²⁷Mihing ngilote in ngualdangte ngim nga natu in lam zong uh hi; amate kammalte mama ngitlona taw kuang hi.

²⁸Ngual ngensiatna sia mihing seksolte in kizelsak hi; amate in buaina piangsakin, ngualtamh hina zongh khentham hi.

²⁹A ngoltol mihingte in a lawmte theamin lalna sungah tumpui hi.

³⁰Nang hong maitui a hong mitsuk te kidawm in; amate in a sia pawlkhat ngaisun zo hi.

³¹Khansauna sia a thutangte ii thaman ahi hi; puakkaanna in minthanna kumpilukhu ahi hi.

³²Thahatna sangin thinsauna phazaw hi. Khuapite na uk siat sangin nangma le nangma na ki uk zawk tu sia phazaw hi.

³³Mihingte in Pathian ii deina a heak natu in aisaan uh a, ahizong a zo kikna sia Pathian ii khensatna bang bek ahi hi.