Read Siyin Chin Paunakte 17 Bible Online

Paunakte 17 - Siyin Chin bible

Paunakte 17

¹Thinngimna taw kidim inn khat sung anneakpoai ah anneak sangin anluum ko bekkhat thinnuam a, neak sia phazaw hi.

²A pil naseam khat in a mannung ngawl a topa ii tapa tungah thunei tu a, a ngamh sung pan khen khat lua tu hi.

³Khamh le ngunn sia mei taw hal in kisit hi, TOPA in mihing khat ii thinsung sit hi.

⁴Mihing ngilote in ngitlo ngaisutnate diksa a, leilot theite in leilot thu diksa hi.

⁵Mihing zawngte na nuisan le, amate a vawt Pathian a selno na hi hi. Midang khat ii kaamsiatna tungtaang ah diksa in na om le daan na thuak tu hi.

⁶Patangnote in a pate huvau in a angtan uh bangin pasal haamte in a tute huvau in angtang uh hi.

⁷Ngual ii zatakte in leilot thu son ngawl hi, tuaciang mihing mawmawte in a mannei thuson tu bangma he ngawl hi.

⁸Mihing pawlkhat in sumnguk piakna sia mitbum bang hi thei tu in ngaisun uh hi; amate in sumnguk piakna taw na theampo seam thei tu in um hi.

⁹Mihingte ii hong it tu na nuam uh le no tungah hong khial ciangin maisak vun. Tatkhialnate teptee in nei leang ngualtamh hina khentham thei hi.

¹⁰A mawmaw khat sia zakhatvei saatna taw a heak tu sangin, a pilvang khat in khatvei teihna taw tamzaw he thei hi.

¹¹Buaina a piangsak tawntung mihing seksolte kungah thina sia kamtai ngilo khat bangin hong pai tu hi.

¹²A mawmawthuai tupna taw a komla mihing mawmaw pawlkhat taw kimu tu sangin, a note a kimatsak vompui khat taw kisi leang phazaw hi.

¹³Thupha khat sia thusia taw na thuk le na bangkua sungah siatna a veng ngei buatu hi.

¹⁴Kam kinial kipatna in tuicimna phung pan tuikee kipat bang hi; a nasiat ma in tawp vun.

¹⁵A maw ngawl khat mawsakna ahizong mi seksol khat tha thongna ahizong TOPA atu in ngaimawkhuai khawm hi.

¹⁶Mihing mawmaw khat ii tungah pilna sin natu sum bosakna in phat tuamna om ngawl hi, banghang ziam cile ama in pianpui khentel theina nei ngawl hi.

¹⁷Ngualtamhte in a ki itna kilak tawntung uh hi. Ngimna thuak khawm tek tu ih hi buale unau khat ih hi man bang om ziam?

¹⁸Khuangaisun ngawl te bekma in ngual leiba losak tu in kamciam tu hi.

¹⁹Mawna a lamnai sia in ngimna vawt a lamnai ahi hi. A tawntungin na kisuangtaak le ngimna a zawzong na hi hi.

²⁰A sia vive ngaisun a, a paute in a pha mu tu lamet thei om ngawl a — siatna bek mu tu hi.

²¹Mawmawthuai nasepte a seam tate ii nu le pa atu in heena le khuangaina simngawl a dang bangma a om bua hi.

²²Maituina in na ci hong damsak hi. A tawntung mainuu a omna in vuitat zok ngawl thina ahi hi.

²³A maan ngawl thukhenmangte in sumnguk ne ku hi, tuasia ciang a khaikim thukhenna kivawt nawn ngawl hi.

²⁴Mihing pil khat in ciim ngamtat tu tumh hi, ahihang a mawmaw khat in a tuatuam tumh hi.

²⁵Ta mawmawte in a pate atu in heena le a nute atu in thinnat khuangaina piangsak hi.

²⁶A maw ngawl khat liau piak tu sia maan ngawl hi; mihing phate daan a khak ciangin thukhaikim lam pan pialsak hi.

²⁷Ama le ama a kimuang khat sia pau tawntung ngawl hi. A om hithiat mihingte sia thuthuk tatak muna nei hi.

²⁸A tawpna ah, mihing mawmaw khat ngawngawn zongh pau bua hen a, a kam iim in om le a ciim a pilvang ma kisa thei hi.