Read Siyin Chin Paunakte 20 Bible Online

Paunakte 20 - Siyin Chin bible

Paunakte 20

¹Zu tamlei neakna in aw saangsak a, hong mawmawsak hi. Zu khamna sia mawmawthuai hi.

²Hong ngalh tawpi khat na kiitak tu bangin a thin uuk kumpipa khat kiita in; ama thin uuksakna in eima le eima kithalupna hi.

³Kam kinialnate sia a mawmaw khat po in pan thei hi; tuate panin kikepna in a zatak huai ngamtatna ahi hi.

⁴A hun lai in lothaw tu a datham mama lotho pa khat in anlaak tu a nei buatu hi.

⁵Mihing khat ii khua ngaisutnate sia, tuikhuk thuk sung a tui bang ahi hi, ahihang thuthuk mu thei khat in tua tui toai thei hi.

⁶Mihing theampo in bangza thumaanin citak khi ziam ci thei tek uh hi, ahihang tuabang ahi takpi mihing ih mu zo tu ziam!

⁷A pa uh thumaan a, a maan nasep a seam le, a tate sia hampha uh hi.

⁸Kumpipa in thukhenna ah to a, a sia a mu ciang khentel hi.

⁹Khat pawpo in ama thinsung thiangtho a, mawna taw kipeal zo ing a ci thei takpi tu ziam?

¹⁰TOPA in a maan ngawl khaikhin toaisuangte le vanh teena a zangh mihingte ensan hi.

¹¹Patangnote zongh amate ii sep le vawt taw amate sia bang ziam ci in lak hi; amate thumaan ziam, pha ziam na son thei tu hi.

¹²TOPA in khuamu thei natu mittangte le khua zaak thei natu bilte hong pia hi.

¹³Na hunte mumutna in na zangh le na zawng tu hi; komla in, tua hile neak tu tam mama na nei tu hi.

¹⁴Vanh lei thei khat in a manham lei hi ci in phun a, tua zawkciang a man a nee zawkna sia kiphatsak pui hi.

¹⁵Na son sia bang ziam ci in na he le, khamh le suangmanpha te sangin a manpha zaw na khat a nei na hi hi.

¹⁶Khualmi khat ii leiba teng losak tu in kamciam a pia mi mawmaw khat sia ama ii neisate laaksakin a lo dong vaukhamna in koisak khol kul hi.

¹⁷Thumaan ngawlna taw na nga nate sia an limbel neak bangin diksa tha tu ni hi, ahihang hai ngawlin hun khat ciang, tuate in kamdim senvui baak bang hi tu hi.

¹⁸Ngaisut piakna pha saang in, zawna na nga tu hi; ngealna om ngawlin ngalsim thawthong heak in.

¹⁹Ngualngen khat in thuku a keam thei ngei buatu hi. Mihing a kam tamleite kung pan kikeam in.

²⁰Na nu le na pa na tomlaw le na nuntakna sia khuazing sungah meiinn mit bangin bo tu hi.

²¹Hauna ol vaial in na nga le nang atu pha ngawl vaial tu hi.

²²Ngual ii nang tungah hong khialnate thuk kik tu in ngaisun heak in. TOPA muang in, ama in a maanin seam tu hi.

²³TOPA in a maan ngawl khaikhin le toaisuang a zangh mihingte ensan hi.

²⁴TOPA in ih tot tu lampi khensat zo hi; tua ahile bangbangin khat pawpo in ama nuntakna ii zotna sang a tel thei tu ziam?

²⁵Pathian tungah piak tu kamciam na vawt ma in, pha tak ngaisun phot in. A zawkciang khuangai tha tu ni hi.

²⁶A ciim kumpipa khat in akua in a maan ngawl seam ziam ci in he tu a, tua pa hesuak ngawlin daan pia tu hi.

²⁷TOPA in khua ngaisut theina le a pha a sia heak theina hong pia hi; eima le eima ih kiphualseal zo bua hi.

²⁸Kumpipa khat in thumaan, thukhaikim le a kilawm bangin a uk laiteng a vaangletna kip tu hi.

²⁹Khangnote ii thahatna thupi ih sa a, khanghaamte puakkaang ih zakta hi.

³⁰Khat vevei thuakna haksa khat in, ih nuntakzia hong khealsak hi.