Read Siyin Chin Paunakte 21 Bible Online

Paunakte 21 - Siyin Chin bible

Paunakte 21

¹TOPA in luitui luanna lam ol takin a heak bangin kumpipa khat ii ngaisutna uk hi.

²Na sep na vawt theampo maan sa tha tu ni hi; ahihang TOPA in na tupna laingilte tungah thukhen hi ci in ciamtee in.

³A maan le ahi tu bangin seam in; tua in sangaw biakpiakna sangin TOPA lungdamsak zaw hi.

⁴Mihing seksolte sia amate ii a kihisakna le a kisaktheina in uk hi, tuaciang hisia in mawna ahi hi.

⁵Pha takpi ngeal in, tam mama na nei tu hi; na lawplai leih le a kicing na nei ngei buatu hi.

⁶Thumaan ngawlna taw na nga hauna bo pal tu a, ahihang thina thaang sung hong tumpui ma in bo ngawl tu hi.

⁷Mihing seksolte sia amate ii ngoltolna taw lal uh a, amate in a maan sep tu nial uh hi.

⁸Mimawte in lampi koai tawn uh hi; a maw ngawlte in a maan seam hi.

⁹A nge hat zi khat taw inn khat sung teenkhop sangin innkhum tungah teang leang phazaw hi.

¹⁰Mi seksolte in ngilkial andu bangin siatna vawt nuam hi; amate in kuama tungah hesuakna nei ngawl hi.

¹¹A kihisak khat in daan a khak ciangin khuangaisun meal ngawl khat ngawngawn in pil law hi. A ciim khat in ama a kihilna tung panin pilna nga tu hi.

¹²Thumaan thutang ahi Pathian in, mihing seksolte inn sungah bang piang ziam ci in he a, a seksolte siacipsak tu hi.

¹³Mizawngte auna aw ngai tu na nial le, hu tu dei a, nangma ii hu ngetna aw hong kizaaksak ngawl tu hi.

¹⁴Mihing khat po in nang tungah hong thin uuk le letsong khat piak ku na taw ama thim tu hi.

¹⁵Thukhaikimin a kisep ciang, mihing phate lungdam uh hi. Ahihang mihing ngilote thinkiamsak hi.

¹⁶A kilawm ngamtatna pan, a puapial pawpo thina in ngak nginge hi.

¹⁷A nuam leilam nuntaknate, sapittui le anlim neak lei nate in nang hong hausak ngeingawl tu hi.

¹⁸Mihing seksolte in mihing phate tungah thuaksak tu a hanciam ngimna teng, amate tung ma ah theng kik hi.

¹⁹A ngenge, a phuphun zi khat taw teenkhop sangin sennealngam sungah teang leang phazaw hi.

²⁰Mihing ciimte in hauna le nopsakna taw nungta uh hi, ahihang mihing mawmawte in sum a nga pawpo a manlang thei zaza in zangh uh hi.

²¹Dik in a, thumaan in, tua hile khansau in na nungta tu hi; ngual dangte in hong zakta tu a, ahi tu bangin hong phatvawt tu hi.

²²A pil a thiam ngalkapmang khat in mihing thahatte ii a cin khuapi khat sia la zo hi, tuaciangin amate ii muan khuapi luphungte susia hi.

²³Buaina taw na kipeal nuam le, na kampau kidawm in.

²⁴A kihisak mihing khat hong lak ta'n, tua hile a kisathei, a kiphasak le ngual atu a ngaisun ngawl mihing khat kong lak tu hi.

²⁵Nasep tu a nial mihing datham khat in ama le ama kithat hi bek hi;

²⁶a dei teng a nga natu a ngaisut sia ama nasep hi bek hi. Thumaan thutang khat ahile ngual pia thei a, ngo takin pia hi.

²⁷Mihing seksolte ii sangaw biakna a piak ciang, a tuanin ngitlo thin taw a pia le TOPA in huatsa hi.

²⁸A leilot khat ii tetti panna sia ki um ngawl hi, ahihang thu a ngaisun kaak mihing khat ii kammal sia kisaang hi.

²⁹Thumaan thutang mihingte in amate le amate kimuang uh hi; a seksol mihingte in a thiam thei za in a kivawttawm uh kul hi.

³⁰Mihingte ciimna pilna, kivakna le thuthuk muna cite sia — TOPA in nang hong langpan le, kimanna nei ngawl hi.

³¹Ngalsim natu in siphute na kinging kholsak thei hi. Ahihang ngalzawna hong pia pa in TOPA ahi hi.