Read Siyin Chin Paunakte 22 Bible Online

Paunakte 22 - Siyin Chin bible

Paunakte 22

¹Minphatna le hau mamana khat sasang teal tu hi le uhte minphatna teal vun.

²A haute le a zawngte in hisia nei khawm hi: Amate nii sia TOPA ii vawt khop ahi hi.

³Mihing khuangaisun theite in ngimna hong pai ciangin mu thei a pial uh hi, ahihang khuangaisun meal ngawl khat sia tua ii sungah tum vacin tu a, a zawkciang kisiik tu hi.

⁴TOPA ii thu ni vun a, kiniamkhiak vun, tua hile hauna, patoaina le khansauna na nga tu uh hi.

⁵Na nuntakna na it le, lamdung ah a kisia mihing seksolte matna thaangte na pial vun.

⁶Patang khat ii a nuntakzia tu na hil vun, tua hile a khan tawntungin ciamtee tu hi.

⁷Mizawngte in sumhaute ii sal ahi uh hi. Sum na pu le leeitopa ii sal na suak hi.

⁸A maan ngawl thaicii na tu uh le siatna hong po to tu hi, tuaciang ngual na zawthawkna uh sia a tawpna hong hi tu hi.

⁹Piakna sungah na ngo vun a, na an uh mizawngte na hawm vun. Tua hu in thupha na saang tu hi.

¹⁰A kihisak mihing sia na pial vun, tua hile kam kinialna, kihauna le min kisiatsakna a om nawn buatu hi.

¹¹Thinsung thianthona le kamthiam paunate zak tu dik na sa le kumpipa ii lawm na hi tu hi.

¹²Leilot theite ii kammalte maan ngawl hi ci in lakna taw TOPA in thumaan thutak sia keamcing hi.

¹³Pasal datham pa in inn veu ah om hi; pusuak leng tawpi in hong man thei tha tu hi ci hi.

¹⁴Palngulna sia thaang hi a — TOPA thin uukna a thuakte tua thaang sungah awk hi.

¹⁵Patangte ii mawmawthuai ngamtatna le bawlpelnate a nei sia a ngeina hi lel hi, ahihang a kilawm bang a, ngoaibul bekna taw amate ngamtat zia tu kihil thei hi.

¹⁶Na hau natu in mihaute tungah letsong na pia a, ahibuale mizawngte na zothaw le nangma zongh na zawng tu hi.

¹⁷Ngai vun, mihing ciimte pauna kong hil tu hi. Amate ii hilciannate kan vun,

¹⁸tuaciang ciamtee in, na zangh kik thei le na lungdam tu hi.

¹⁹TOPA na pummuan tu ka dei hi; tua hu in tu in hong son tu khi hi.

²⁰Nang atu in paunak sawmthum kong at zo hi. Tuate sungah heakna le ngaisut pha piaknate om hi,

²¹tuaciang tuate in thumaan thutak sia bang tatak ziam ci in hong hil tu hi. Tua zawkciang tuate a zong tu in hong kipaisak ciang a maan thu nong ciapui tu hi.

²²Hi thei tang ci in mizawngte tung pan hamphatna la heak vun; thukhenzum ah cimaw in a dingte tung pan hamphatna la heak vun.

²³Topa in amate ii thu sia amate taangin nialsak tu a, amate nuntakna a lauthawn po ii nuntakna kilauthawn tu hi.

²⁴Mihing thinngam, thin ngeamte ngualtamh in na man heak vun.

²⁵Amate omziate na zui tha tu a, na kikheal kik zo buatu uh hi.

²⁶Mi dangkhat ii leibate losak tu in kamciam pia heak vun.

²⁷Lo zawk ngawlna khat nei lete na lupna dongin amate in hong laaksak tu hi.

²⁸Na taanghpupite ii ngisuang luite na khiin heak vun.

²⁹Nasep pha tak a, a seam mihing khat hong lak tavun, tuaciang mihing tam mamate sang a phazaw, kumpite kitholpui tu dong a, a kilawm khat kong lak tu hi.