Read Siyin Chin Paunakte 23 Bible Online

Paunakte 23 - Siyin Chin bible

Paunakte 23

¹Mihing thupi khat taw an nekhawm tu in na to uh ciang, ama sia akua ziam ci in phawk nginge tavun.

²An na du mama uh zong na kidawm tavun.

³Ama hong lui anlimte neak nopin nei leih heak vun; hong aitaana khat po zongh hi thei tha tu hi.

⁴Hau tu na hanciamna ah nangma le nangma na tha a bo ngawl natu in ciimna a khom na nei in.

⁵Na sumte sia muvanlai khat a tha hong po in a len bangma in thakhat thu in bo thei hi.

⁶Mihing a iiciilte sabuai ah an na ne heak vun, tua ahibuale zong anlim hong luite hu in duhop neak heak vun.

⁷“Tawm beak ne lai in” hong ci kale hong ci takpi hi ngawl thei hi. Ama ii ngaisutna sia ama tatak ma ahi hi.

⁸Na neak sa teng na lua kik tu a, na sialpokna theampo a vaal thong hi tu hi.

⁹Mihing mawmaw khat sia a khua heak thei natu in na sonpui heak vun; ama in thupi sa thei meal ngawl hi.

¹⁰Bangma hunin ngisuang luite na khiin ngei heak vun, ahibuale tangate neisa leitang na sut heak vun.

¹¹TOPA sia amate ii a vaanglian a dal pa hi a, nang hong langpanin amate ii sang panin hong pau tu hi.

¹²Na syapa ii hong hilna pha tak nadon in a, na sin thei theampo sin in.

¹³Patangte tungah tek tu le pau tu haisaang heak in. A kilawm bang a, a ngoaibul bekna in ama thisak ngawl tu hi.

¹⁴A tatakin ci leang ama ii nuntakna kihun zongh hi thei hi.

¹⁵Tapa awng, nong ciim le ka lungdam mama tu hi.

¹⁶Ciim kamte na pau ka zaak ciang ka angtang tu hi.

¹⁷Mimawte eang heak in; TOPA thasiana sia na nuntak sung na thintoi thu hisak in.

¹⁸Tuabang hi lete na maivang tu hi.

¹⁹Ngai in ka tapa awng, ciim in a na nuntakzia thuk takin ngaisun in.

²⁰Sapittui tam lei a nete, ahibuale an a bebente taw na kithawl heak in.

²¹Zukhamte le antuangte zawng vaial tu hi. Anneak le mut sia nasep in na nei le hai ngawlin puansia ngapkaai na silh tu hi.

²²Na pa thuson ngai in; ama ngawl taw piang thei ngawl tu ni hi. Na nu a khanhaam ciangin ama thupi na saknate lak in.

²³Thumaan thutak, ciimna, sintheina le khua ngaisut theina, hite sia a man piak taak a, ahizong na zuak tu in manpha lei hi.

²⁴Mihing thutang khat ii pa in a lungdam natu thu om hi. Tapa ciim khat tungtaang ah na angtang thei hi.

²⁵Na pa le na nu sia nang huvau in angtang tahen; tua lungdamna sia na nu pia in.

²⁶Tapa awng, hong nadon ta'n a, ka nuntakna sia nangma ettee tu hisak in.

²⁷Pumpi zuak numeite le a paktat numeite sia a lauhuai thi theina thaang ahi uh hi.

²⁸Amate in ngualsuam phalakte bangin hong ngakin pasal tam mamate thumaan ngawl suaksak hi.

²⁹Zu tam ne leilam a, a nam thak a ne nuam lai khat kei hong lak ta'n, tuaciang a thinngim mama, khuangaihuai a kisa, ngual buaisak tawntung le lungkim ngawlin a phun tawntung khat kong lak tu hi. A mit san neinoi a, a pial thei tu hi napi liamnate nei hi.

³¹Sapittui sia bangza po in san kilkel in, hai sungah tee vasip a, valhsuk ol hikale na ze etsak heak vun.

³²A khuavak ni zing ciang ngul nguu nei ii tuk bang hi na sa tu hi.

³³A kiitakhuai lului na mu tu a, na ngaisutna le na kampauna a thiangtho vaset buatu hi.

³⁴Tuipi tungah teambaw nguih bang, teambaw kilok tung to a, a saangna ah hong veito bang na hi tu hi.

³⁵“Hong kivua hi nak tu hi ve aw,” na ci tu a, “Vel zazaan thuak hi vak ing, ahihang ka phawk bua hi. Banghang khangciim thei ngawl khi ziam? Zu tawm ma kisamh lai ing,” na ci tu hi.