Read Siyin Chin Paunakte 24 Bible Online

Paunakte 24 - Siyin Chin bible

Paunakte 24

¹Mihing tatsiate na eang heak vun a, amate pawlpui tu in na hanciam heak vun.

²Buaina piansak tu sia amate ngaisut pi hi lel hi; amate a pau simin mihing khat pawpo ii thin nasak tu hi.

³Innkuante in ciimna le telthiamna doppha in kisa hi.

⁴Heakna omna munah inn doituamte sia a manpha na hoite taw kizeam hi.

⁵Ciimna in thahatna sangin phazaw hi. Hi hi, heakna sia thahatna sangin thupi zaw hi.

⁶A tawpkhakna ah ngal na do ma in pha takpi na ngeal uh kul a, tuaciang ngaisut piakna pha tam na ngana zui in zawna zongh na nga zaw thei tu hi.

⁷Ciimkam tepteete sia mihing mawmaw khat ii tel tu in thuk lei hi. Amate in a thupi kikupnate sungah a son tu bangma he ngawl hi.

⁸Thusia bebek na ngeal le, buaina piangsak pa ci in na minthang tu hi.

⁹Mihing mawmaw khat ii ngaisut tupnate sia mawna taw kidim hi. Midangte siatson bebek a kinte ngual in ensan hi.

¹⁰Phatmawk hun sungah, na thaneam le a thaneam takpi ma na hi hi.

¹¹Mihing khat sia thumaan ngawl thu taw a kithat tu na mu le ama na hut natu in haisaang heak in.

¹²Kei taw bang kisai ziam ci tha tu ni hi, ahihang Pathian in na thinsung tawngh hong he a, tua tungah thu hong khen tu hi. Ama in nang hong en nginge hi; ama in he hi. Tuaciang na sep babangin ama in thaman hong pia tu hi.

¹³Tapa awng, khuaitui ne in; khuaitui pha hi. Khuai lu sung a, khuaitui sia na leei tungah thum ahi bangma

¹⁴ciimna sia na thaa atu in pha hi ci in na telthiang tu hi. Ciimna nga in, tua hi le na mai vang tu hi.

¹⁵Mihing thumaan khat suttol tu a tum, ahibuale a inn a laaksak nuam mihing seksol pa bang hi heak vun.

¹⁶Mihing thumaan khat in bang tanvei po a puk hial zong tho kik tawntung tu hi; ahizong lalna in mihing seksolte siasak tu hi.

¹⁷Na ngal pa lalna a thuak ciangin lungdam heakin a, tuaciang a lutu ciangin lungdam heak vun.

¹⁸Ngual tungtuan nopna na nei le TOPA in hong he tu a, a dei buatu hi; tuasia ciang TOPA in amate daan piak awl thei tu hi.

¹⁹Mihing ngilote hangin na thinngimsak heak in; amate eang heak in.

²⁰Mihing seksol khat sia a mai bing hi — lamet tu a nei bua hi.

²¹Ka tapa awng, TOPA thasiana nei in a, kumpipa zongh zakta in. Kumpipa langpanin a leedote taw bangma kipee-awna nei heak in;

²²tuabang mihingte tawmvei no sungin siacip thei hi. Pathian ahibuale kumpipa piansak thei lalna sia na he ziam?

²³Mihing ciimte in hite zongh na ci lai hi: Thukhen pa khat atu in doidan nopna a nei sia maan ngawl hi.

²⁴Mikhial khat khial ngawl hi a cile ama sia mihing theampo in haamsiat in ensan tu hi.

²⁵A mawte daan a pia thukhenmangte ahile khangto tu a, ngual phat sonna nga tu hi.

²⁶A thumaan kam zo kikna in lawm tatak hina lim khat ahi hi.

²⁷Na lo ante laak pha zo a, na nuntak natu thalaw thei tu in na kimuan mateng, na inn sa heak in a, innkuan phut heakin.

²⁸A thu om ngawlin ngualdang khat langpanin tetti pang heak in, ahibuale zong ama ii huvau telkhial thei thute phuang heak in.

²⁹“Ama ii kei hong vawt bangin ama tungah vawt tong! Ama thuk tong!” ci heak vun.

³⁰Pasal datham le a mawmaw khat ii lo sung le sapithuan sungah ka vak hi.

³¹Tua munte sia lingkungte le lopate in khunel hi. A huang uumna phungte zongh cimh zo hi.

³²Hite ka en a, khua ka ngaisut ciang tua tung panin hi bang heakna khat ka nga hi:

³³na uuk le tawmvei sung mu zok in. Leekoai in tawmvei tawlnga in,

³⁴ahihang na mut lanin zawnna in hiamh toai phalak khat bangin hong sim tu hi.