Read Siyin Chin Paunakte 25 Bible Online

Paunakte 25 - Siyin Chin bible

Paunakte 25

¹Judah Kumpipa Hezekiah kumpi zum sung pan ettee in a ki at kik Solomon paunakte om thua lai hi.

²Pathian ii a seal thute hu in ama zatak ih pia hi; kumpipate sia tua thu a thiangin a sontel uh hu in zatak ih pia hi.

³Kumpipa khat ii ngaisut sia na he ngei bua uh hi; ama ngaisutnate in ei bat zawk ahi ngawl, van saang bang, tuipi thuk bang ahi hi.

⁴Ngunn sung panin a nin teng a laakkeak ciangin ngunn seakpa in na hoi mama khat piangsak thei hi.

⁵Kumpipa kung panin ngaisutna pia mihing siate heam le uhte a kumpi ukna sia thukhaikim thu om hi ci in thang tu hi.

⁶Kumpipa mai ah na din uh ciangin hong nasia ngaisut natu in hanciam heak vun a, mihing thupi bangin kiheang heak vun.

⁷A thupi zaw ngualdang khat atu na dinmun awn a hong kisawl sangin dinmun saangzawna ah kaato a hong kisawl tu sia phazaw hi.

⁸Na muna uh khat taw kisai in thukhenzum theng papaih heak vun. Tetti dang khat in nang muna sia maan ngawl hi ci in hong lak thei le bang law tu ni ziam?

⁹Na innpaamte taw ngaisut kisik ngawlna khat na nei uh le noma sungah kilemtua tavun a, thuku khat po pualaak se heak vun.

¹⁰Tua ahibuale mihing theampo in thuku keamcing thei ngawlte ci in hong he tu a, tua maizumna na pu zo ngei buatu uh hi.

¹¹Ngaisutna khat pha tak a, pualaak theina in ngunn tung khamh taw zep bang ahi hi.

¹²Thuakna a nei ngeisa mihing khat ii kidop tu thupiakna a saang nuamte sia khamh khutzungbute ahibuale khamh pha belte taw a kivawt kizepnate sangin phazaw hi.

¹³A muanhuai kamtaipa sia anlaak hun nisat laitak tuivot bangin, a sawlpa atu lungpilna ahi hi.

¹⁴Piak tu kamciam napi a pia ngeingawlte sia nguatui paai ngawl meeikaai le vuite bang ahi hi.

¹⁵Thin sau takin zolna in a tha khobel kinanna sutham thei a, ngamukte thinsung ngawngawn zo thei hi.

¹⁶Na kisap za sangin a tamzaw khuaitui ne heak vun; a tam lei le hong luasak tha tu hi.

¹⁷Na innpaamte mun haw vazut leih heak vun; amate in hong cimtak tu a, hong ngaimaw thei tu hi.

¹⁸A maan ngawl kimawsakna sia, namsau, moltawng, ahibuale thaltang hiam bangin kiitakhuai hi.

¹⁹Phatmawk hun sungah a muanhuai ngawl khat muan thaakna sia ha ngawk sa taw an thai nop bang, ahibuale peangbai sa in lampai taw kibang hi.

²⁰A thin kiamcip khat kungah lasakna sia khuasik laitak a puan suusakna, ahibuale a liamma sung ci noisakna taw kibang hi.

²¹Na ngalte a ngil a kial le an pia in; a dang a ko le amate ii dawn tu khat pia in.

²²Maizumna taw ama na kaanghsak tu a, tuaciang TOPA in thaman hong pia tu hi.

²³Saksang vui in ngua hong puak bangma ngual ngensiatna in thin uukna hong puak takpi hi.

²⁴A nge hat zi khat taw inn khat sungah teenkhop sangin innkhum tungah teang leang phazaw hi.

²⁵A khak belin, a khualana mun pan thupha zaakna in na dangko laitak tuivot neak bang ahi hi.

²⁶Mihing pha khat in mihing ngilo khat ii thu a zawp ciang ciktui nin ahibuale nguu a kitha tuikhuk khat hong phawksak hi.

²⁷Khuaitui tam lei sia nang atu pha ngawl hi, tuasia bangma, pokna tam lei nga tu hanciam zongh pha ngawl hi.

²⁸Na thin uukna na khaam zo buale luphung taw a ki uum ngawl, a kisim thei khuapi dongdai bangin na cimaw tu hi.