Read Siyin Chin Paunakte 26 Bible Online

Paunakte 26 - Siyin Chin bible

Paunakte 26

¹A mawmaw khat pok natu sia khaal lai vuuk taak, ahibuale anlaak hunlai nguazu tu bang keakin suak thei ngawl hi.

²A thuak tu ma in na kilawm bua nale haamsiatna in bangma hong law zo ngawl tu hi. Tuate in leleang a, tawlngak hun a nei ngawl vacimte taw kibang hi.

³Siphu khat sia saat kul a, laa khat sia kamkhau bul kul a, tuaciang a mawmaw khat sia vel kul hi.

⁴A mawmawthuai dokna khat na zo le, a dongh pa bangma a mawmaw na hi hi.

⁵A mawmawthuai dokna khat sia a mawmawthuai ma in zo kik lete, a dongh sia in ama kingaisut bangin a pil ngawl hunlam kiphawk tu hi.

⁶Mihing mawmaw khat kamtai in na sawl le, nangma peang a saattan bang na hi thei hi; buai natu a zong na hi hi.

⁷A mawmaw khat in paunak khat a zak theina sia a koncip khat ii a peang a zak thei bang bek hi.

⁸A mawmaw khat po pokna in saili kuung tungah suangtang kikhit bang bek ahi hi.

⁹A mawmaw khat in ciimkam teptee a zak ciang zukham khat ii a khut sung pan ling tangciak a daw nop hong phawksak hi.

¹⁰Thacialpa khat in, hong vak thawthong a mawmaw khat po tha a cial le, a kisai theampo nasak bek hi.

¹¹A mawmaw khat in mawmawt vai khat a nii veina in a vawt kik le a luak sa a ne kik ui khat taw kibang hi.

¹²A ciim ngawl khat ciim a kisa sia sangin, a mawmawbel khat phazaw lai hi.

¹³Mihing dathamte banghangin a inn uh pan pusuak ngeingawl ziam? Amate in bang kiita ziam? Tawpite ziam?

¹⁴Mihing dathamte sia a lupna tungah kilum lelet uh hi. Innkha khat pattaa tungah a kihei za sangin, tua pa in a khuala zaw theng ngawl hi.

¹⁵Mi pawlkhatte sia ama le ama a kam sungah an a kibak tu takpi zongh datham hi.

¹⁶A datham mihing khat in, amate ii ngaisut thiamna a lak thei pasal sali sangin pilvangzaw in kingaisun tu hi.

¹⁷Nang taw kisai ngawl thu khat taw kam kinialna sungah kihelna sia khua sung lampi tawnin ui khat a bil pan zap taw kibang hi.

¹⁸Mihing khat in ngualtheam a, a zawkciang ka ciammuina zam a cite sia, a lauhuai ngalhiam taw a kimai mihing thin amh khat taw kibang hi.

²⁰Thing om buale mei mit hi; thu nawnsan om buale kihauna bo hi.

²¹Meihol in meikamte linghsak a, thing in mei kuangsak hi, buaina a piangsakte in kam kinialna kipee suaksak hi.

²²Thu nawnsan sia lim mama hi! Bangza in valh thanuam hi ziam!

²³Na ngaisut takpi teng seal a, thumaan son ngawlna in a man ol leibeal zutna in a kizangh cimbeng taw kibang hi.

²⁴A kihitheamsak mihing khat in ngual a etsatna sia kisialpokna kammalte taw seal hi.

²⁵A kampaunate ahile zaaknophuai tha tu hi, ahihang um heak vun, banghang ziam cile a thinsung ah ki etsatna a dim in om hi.

²⁶A ngual etsatna sia phualseal zo tha tu hikale, mihing theampo in a ngitlo ngamtatnate mu tu hi.

²⁷Ngual thaang a sia mihingte sia amate ma awk kik vacin hi. Min a cimhsak mihingte sia min in vuknelh hi.

²⁸Leilot thu taw ngual thinnat natu a vawt nuam khat sia na etsat kul hi. Thumaan ngawl sonna in siatna simngawl a dang a piangsak bua hi.