Read Siyin Chin Paunakte 27 Bible Online

Paunakte 27 - Siyin Chin bible

Paunakte 27

¹Zing ciang thu taw kisai in kisuangtaak khol heak vun. Tua hun le tu kilaklaw bang piang tu ziam na he bua uh hi.

²Midangte in poksak vun — khualmite ngawngawn in poksak vun; bangma hunin noma le noma kipok heak vun.

³Mawmawt ngamtatna pan a piang thei ngimnate sia suang le sen ii ngitna taw kisontee thei ngawl hi.

⁴Thin uukna sia tatkha a, lalna piangsak thei hi, ahihang ki eenna sia bangma taw kiteengat thei ngawl hi.

⁵Mihing khat ii a khialna hu in a kilangh in hilna pauna sia kei bangma hong awlmawk ngawl hita a, hong ci saang phazaw hi.

⁶Ngualtamh khat in hong nasak tha hial zong, a pha piang le a deina hi. Ahihang na ngal khat in a khut taw na liangko pan hong koai ciang — na kikeam vun!

⁷Na ngil a va laitakin khuaitui zongh na du buatu hi, ahihang na ngilkial laitakin, ankha khat zongh thum hi.

⁸A inn pan a puapial khat pawpo sia, a bu sung pan a leang vacim taw kibang hi.

⁹Paaknamtui le sathau namtuite in hong lungdamsak zaw a, ahihang ngimna in na thinnopna bosak hi.

¹⁰Nangma ngualtamhte ahizong na pa ngualtamhte ahizong mangil heak in. Ngim na nga le na suapuipa kungah hu ngen heak in; na nai a om innpaam khat in a khuala a om na suapuipa sangin hong hu thei zaw hi.

¹¹Ciim in, ka tapa awng, tua hile ka lungdam tu hi; kei tungah maw hong zong khat po munah ka zo kik natu om hi.

¹²Mihing khuangaisun theite in ngimna hong pai ciangin mu thei a pial uh hi, ahihang khuangaisun meal ngawl khat sia tua ii sungah tum vacin tu a, a zawkciang kisiik tu hi.

¹³Khualmi khat ii leiba teng losak tu in kamciam a pia mi mawmaw khat sia ama ii neisate laaksakin a lo dong vaukhamna in koisak khol kul hi.

¹⁴Zing tuungin na ngualtamh te awnging takin nuksetna kam taw na phong le a haamsiat taw zong na kibang thei hi.

¹⁵A nge hat zi khat sia nguazuk ni a, mal khakhat veu a taak vakek tui taw kibang hi.

¹⁶Bangbangin ama thimsak thei tu ni ziam? Vui vak thimsak tu, ahibuale na khut sungah sathau hum zawk tu na hanciam ngei ziam?

¹⁷Thik le thik kitaat a kihiamsak bangin mihingte in khat le khat tung panin heakna nga hi.

¹⁸Theikung khat pha takin ou lete theinga na ne tu hi. A topa a ou naseam khat sia kipatoai tu hi.

¹⁹Tui sung pan hong leng kik na mu sia nangma maitang hi a, tuasia bangma na thinsung ah na mu sia nangma tatak na hi hi.

²⁰Mihingte ii deina sia mithi khua bang ahi hi — a tamzaw lai te atu mun awng om tawntung hi.

²¹Meisa in khamh le ngunn a tak le a theam sit a; mihing khat ii minthanna zongh kisit thei hi.

²²A mawmawte a thi dektak dongin na vuak bel hang amate mawmawtna lakeak zo ngawl lai tu ni hi.

²³Na tuute le na khuite na hi theiza in pha tak vak in,

²⁴banghang ziam cile hauna sia kip ngawl hi. Minamte ngawngawn a tawntungin kip ngawl hi.

²⁵Taangphawte na tan a, tua zawkciang lo sung pan a piang kik tu taangphawte a khan lan in mualpangh ah lopate na meet hi.

²⁶Na tuute pan a piang tuumulte taw puansilhte na vawt thei hi, tuaciang keal pawlkhat na zuak man sum taw leitang na lei thei hi.

²⁷A om lai kealte in nangma le na innkuanpuite, tuaciang na naseam numeite atu zongh noai hong pia tu hi.