Read Siyin Chin Paunakte 29 Bible Online

Paunakte 29 - Siyin Chin bible

Paunakte 29

¹Nang hong kipau hong kihil simin na thin na puisak vaial le ni khat ni ciang sukcipna na thuak tu a, na lu na phong kik zo nawn buatu hi.

²A thutang ngamukpa khat hong lak tavun, a lungdam ngam mite kong lak tu hi. A seksol ngamukpa khat hong lak tavun, a thinngim ngammite kong lak tu hi.

³Ciimna thupi na sa le na pa in nang hangin angtang tu hi. Pumpi zuak numeite tungah, sumzakna sia a mawmawthuai maizakna hi.

⁴Kumpipa in thukhaikim sia thinbot in a nei le a ngam thahat tu a, ahizong ama in sum bekma thinbot in a nei ciang a ngam lalsak tu hi.

⁵Na ngualtamhte na sialpok le, nangma le nangma thaang kisia na suak hi.

⁶Mi ngilote amate mawna sungah awk hi, thumaan mihingte ahile lungdam in suakta hi.

⁷Mihing pha khat in mizawngte nga tuakte he a, ahihang mihing seksolte in tuabangte a tel thei bua uh hi.

⁸Ngualdangte atu khualna a nei ngawl mihingte in khuapi bup buaisak thei hi. Mihing ciimte in thimsak khipkhep hi.

⁹Mi pilvang khat in a mawmaw khat tungah thu a vawt ciang, mi mawmaw sia nui bekin, aw saang taw kam ngaldo pau hi.

¹⁰Ngual thalup tu a ciza ngawl mihingte in a thumaan pawpo ngaimaw hi, ahihang thumaan mihingte in tuabang mihing khat ii nuntakna huu tu hi.

¹¹Mihing mawmawte in a thin uukna uh kilanghsak hi, ahihang khuangaisun theite in thinsau in a thin uukna iip hi.

¹²Ngamuk khat in a maan ngawl thute a nadon le, a ulian theampo sia leilot theite ahi tu uh hi.

¹³Mizawng pa le ama a zothaw pa in hisia nei khawm hi — TOPA in amate ngeal sia mittangte neisak khawm hi.

¹⁴Kumpipa khat in mizawngte nga tu a kilawm thute a panpui le ama in kum saupi ngam uk tu hi.

¹⁵Patangte atu in hilna le tekna sia pha hi. Patangte in amate uuk bang bekin a khang le a nute maizumsak tu hi.

¹⁶Mihing ngilote ngamukna za hong nga ciang khialna lian khang hi. Ahihang a thutangte in tuabang mihingte ii kiamsukna mu tu in a nungta tu hi.

¹⁷Na tate tek vun, tua hile a tawntungin ama hu in na angtang tu hi. Amate in maizum natu ahang thu omsak ngeingawl tu hi.

¹⁸Pathian ii lamlak ngawl minam khat sia thu kinitna om ngawl minam ahi hi. Pathian thukham a zui pa in mihing lungdam ahi hi.

¹⁹Naseamte sia thusonpuina bek taw na hil na pau thei buatu hi. Amate in hong tel thei tu ahihang hong thusim tuan buatu uh hi.

²⁰Ngaisun ngawlin a pau khat po atu sangin, a ngoai a mawmaw khat atu lametna om zaw hi.

²¹Na naseam khat sia a no panin, a dei theampo na pia le ni khat ni ciang na neisa theampo ama in hong suanthal tu hi.

²²Mihing thinngamte in kihauna le buaina tam mama piangsak hi.

²³Kisaktheina in, kiamsukna sung hong then tu a, ahizong na kiniamkhiak le hong kizakta tu hi.

²⁴Nguta khat ii kipawl puipa sia a ngal ci phabel ahi hi. Thukhenzum sungah thumaan a son le nguta pa daan kipia tu a, tuabang a son buale Pathian in nguta pa haamsiat tu hi.

²⁵Midangte ii nang hong ngaisutnate thin nopmawkin na nei tu sia lauhuai hi, ahizong TOPA na muang le ngammuangin na om tu hi.

²⁶A kuama po in ngamuk khat ii hong deisakna kithangai tek hi, ahihang TOPA tung pan bekin thutang khenna na nga thei hi.

²⁷Thutangte in mi seksolte ensan a, mi seksolte in thutangte ensan hi.