Read Siyin Chin Paunakte 31 Bible Online

Paunakte 31 - Siyin Chin bible

Paunakte 31

¹Kumpipa Lemuel tungah a nu ii a ciliaphuai kampaunate in hi teng hi;

²“Nangma in ka thungetna hong kizo kikna ka it ka tapa na hi hi. Nang tungah bang kong son tu ziam?

³Na tha nei theampo numei le pa omkhopna huvau in zangh heak in a, na sum theampo numei tungah zangh heak in; tuate in kumpipate susia hi.

⁴Hong ngai ta'n, Lemuel awng. Kumpipate in sapittui ne ngawl tu hi, ahibuale, zu thangai leilamna thin nei ngawl tu hi.

⁵Zu a neak uh ciang amate in thukhamte mangil in, kitaangsapna a nei mihingte ii nga tuak thute ngaingon uh hi.

⁶Zu sia a thi dektak mihingte, a thinngim mamate atu ahi hi.

⁷Amate in a zawnna le a khuangaina a makngil thei natu in dawn tahen.

⁸Amate atu, thu a son thei ngawl mihingte atu in sonsak in. A cimaw theampo ii nga tu a kilawmte sungsia in.

⁹Amate taangin pau in a, thutang thukhenpa hi in. A zawngte le taangsapna a neite ii nga tuak thute sungsia in.

¹⁰A zaktel mama zi khat mu natu bangza in haksa ziam! Ama in suangmanpha te sangin tam mama in manpha zaw hi.

¹¹A pasal in ama tungah muanna nei a, tuaciang a pasal a zawng ngei buatu hi.

¹²Tua nu in a nuntak lai tawntungin a pasal tungah phatna vawt a bangma hunin siatna a thuaksak bua hi.

¹³Ama in tuumul puante le puannealte takin komla tawntung hi.

¹⁴Vanh pua teambawte bangin ama in a khuala munte panin inn ah an hong ciapui hi.

¹⁵Zingsang khuavak ma in tho a, innkuan anneak tu vawtin, a naseam numeite sep tu teng zongh son hi.

¹⁶Ama in leitangte en in lei hi, ama thalaw sa sum taw sapitkungte ciing hi.

¹⁷Ama in naseam hat khat hi a, thahatin lawp hi.

¹⁸Ama in a sep a vawt theampo ii manphatna he a, khuazan dongin naseam hi.

¹⁹Ama in khauzomin ama puan tu tak hi.

²⁰A zawngte le a kitaangsamh te ngo takin pia hi.

²¹Vuuk a kiak hangin a thin a ngim bua hi, banghang ziam cile a innkuanpuite in puan lum nei uh hi.

²²Ama in luppha puanvante takin puanneal sandup phate silh hi.

²³A pasal sia mihing tam ii heak, ngammite ii lampui khat ahi hi.

²⁴Ama in puansilh le kawngkhaute vawtin vanhzuakte munah zuak hi.

²⁵Ama hat a, ngual in thasia in mailam atu a patau bua hi.

²⁶Ama in a pau ciang kamneam le ciimkam taw pau hi.

²⁷Ama in a tawntungin komla a, a innkuanpuite kisapte vah hi.

²⁸A tate in ama thupi a sakna uh lak a, a pasal in pok hi.

²⁹A pasal in: “Numei tam mamate in zipha vive hi a, ahihang tuate theampo sung pan nang sia a phabel na hi hi,” ci hi.

³⁰Ngaibanna in hong theam thei a, mealhoina zongh bo thei hi, ahihang TOPA a zakta numei khat sia kipok tu hi.

³¹Ama sep le vawt theampo tungah minphatna pia vun. Ama in mihing theampo ii zatakna a nga tu in kilawm hi.