Read Siyin Chin Paunakte 4 Bible Online

Paunakte 4 - Siyin Chin bible

Paunakte 4

¹Ka tapa awng, na pa hong hilnate ngai in. Pha takin nadon lete telthiamna na nei tu hi.

²Nang kong hil sia pha ahikom a vekpi in ciamtee in.

³Ka nu le ka pa ii tapa khat bek ahi keima ka patangno lai in,

⁴ka pa in hong hil hi. Ama in, “Ka ci theampo ciamtee in a, mangil ngei heak in. Kong sawl bangin ngamta in, tua hile na nungta tu hi.

⁵Ciimna le thuthuk mu theina kan in! Kong cite sia mangil heak in a, awlmawk ngawlin om heak in.

⁶Ciimna taisan heak in; tua hile tuasia in nang hong hung tu hi; ama it in, tua in nang hong keamcing tu hi.

⁷Ciimna ngana sia na vawt thei sung pan a thupibel ahi hi. A dang theampo na nga tazong thuthuk muna ma kan in.

⁸Ciimna thangai in, nang hong liansak tu hi. Ciimna pom in, minphatna hong pia tu hi.

⁹Ciimna in na minthanna lukhu ahi tu hi,” hong ci hi.

¹⁰Ka tapa awng, hong ngai ta'n. Kong son tute thupi laak in, tua hile khansau in na nungta tu hi.

¹¹Ciimna le a maan lampi taw nuntakzia hong hil zo khi hi.

¹²Ciim takin kal na suan le bangma in na lampi hong khak ngawl tu a, na tai ciangin na lutu buatu hi.

¹³Na sinsate a tawntungin ciamtee in. Na sin pilna sia na nuntakna ahi hi — pha takin keamcing in.

¹⁴Mi ngilote paina ah pai heak in. Mi seksolte ngamtatna ettee in zui heak in.

¹⁵Tuabangin vawt heak in! Siatna pan kikeam in! Nial in a, na pai ngei bangin pai in.

¹⁶Mi seksolte sia a maan ngawl ngamtatna khat peuma a vawt bua uh le mutthip thei ngawl uh hi. Khat po a liamsua bua uh le amate mutthip thei ngawl uh hi.

¹⁷Seksolna le ngoltolna sia amate atu in an le tui bang ahi uh hi.

¹⁸Thutangte tot lampi sia sun dongin, a taang vaial nisuak taw kibang hi.

¹⁹Mi seksolte lampi ahile zan bangin zing hi. Amate in liik ahihang bang tungah, lutu ziam ci in a mu thei bua uh hi.

²⁰Ka tapa awng, ka ci teng pha takin nadon in. Ka kammalte ngai in.

²¹Tuate in nangma taisansak heak in. Tuate ciamtee in a, na thinsung ah keam in.

²²Tuate in a tel theite tungah nuntakna le ciidamna pia tu hi.

²³Na khua ngaisut dan kidawm in; na nuntakzia sia na khua ngaisutna in zeam hi.

²⁴A maan ngawl peuma bangma son ngei heak in. Ngual theamna le leilot thu peuma zangh heak in.

²⁵Citak kimuanna taw maisang mitsuan in; maizumna taw kun heak in.

²⁶Na sep po pha takin ngeal phot in, tua hile nasep theampo a maan suak tu hi.

²⁷Siatnate pial in a, tang takin mai sangah kalsuan in. A maan lampi panin kal khat zongh pial heak in.