Read Siyin Chin Paunakte 5 Bible Online

Paunakte 5 - Siyin Chin bible

Paunakte 5

¹Ka tapa awng, hong nadon ta'n a, ka ciimna le thuthuk ka muna hong ngai ta'n.

²Tuaciang ngamtat luheakzia ahi tu bang na he tu a, na kammalte in heakna na nei hunlam hong lak tu hi.

³Pasal dang khat ii a zi muk sia khuaitui bangin thum tha tu a, ama ii hong napna in olive thau bangin neal tu hi,

⁴ahihang a zawkciang tua nu in a sia a kha le natna bek hong nusiat hi.

⁵Ama in mithi khua hong zotpui tu hi; ama tot lampi in thina lampi hi.

⁶Ama in nuntakna lampi tungah a om bua hi; vakthapin bang teng piang ziam ci zongh a tel bua hi.

⁷Tu in hong ngai tavun, ka tapate awng, ka pau teng mangil ngei heak vun.

⁸Tuabang numei sia ii kung panin kikeam vun! Ama ii bangkua nai ngawngawn zongh neak tha heak vun!

⁹Na neak uh le, nidang na nei ngei kizataknate sia midangte in lua tu a, hesuakna sel mite khutsa taw na khanthi tu uh hi.

¹⁰Hi hi, khualmite in na hauna theampo la siat tu a, na thalaw sa theampo sia ngualdang khat atu hi tu hi.

¹¹Na thi natu lupmun tungah na tatau tu a, na sazang le na thangolte kine tum tu hi,

¹²tuasia ciang, “Banghangin he thei ngawl khi ziam? Banghangin khat po in teksak ngeingawl ka na khi ziam?

¹³Ka syate thu ka ngai bua a, amate ka thusim bua hi.

¹⁴Tuaciang thakhat thu in mipi mai ah maizum minsiat ka thuak sia keima le keima ka kihe hi,” na ci tu hi.

¹⁵Na zi tungah thumaan in a, na itna sia ama bekma pia in.

¹⁶Numei dang taw na nei na tate in bangma phattuamna hong pia ngawl tu hi.

¹⁷Nangma tate nangma hong hu tu in hong khang tu a, ngualdang a hu tu ahi bua hi.

¹⁸Tua ahikom na zi taw lungdam vun a, na teenpui nu taw thinnuamin om in —

¹⁹ama sia sangai bangin ngaibaang in thuzawk huai hi. Ama ngaibannate taw na lungdamsak in; ama hong itna in nangma tuamsak in.

²⁰Ka tapa awng, banghangin na itna sia numei dang khat pia tu ni ziam? Banghangin ngualdang khat zi ii ngaibannate lungngul zaw tu ni ziam?

²¹TOPA in na ngamtatna theampo hong mu hi. Na paina theampo ama in hong encik hi.

²²Mi seksol khat ii mawnate sia thaang khat ahi hi. Amate mama ii mawna ngeen sungah amate awk uh hi.

²³Amate in a pumpi ki uk zo ngawl ahikom thi uh hi. Amate mawmawt leilamna in a thaankuul uh ah amate puak tu hi.