Read Siyin Chin Paunakte 6 Bible Online

Paunakte 6 - Siyin Chin bible

Paunakte 6

¹Ka tapa awng, ngualdang khat ii leibatte vaipuak la tu in kamciam na vawt ngei ziam?

²Nangma kammal ma in hong man kik ngei a, nangma kamciam in thaang hong sia ngei ziam?

³Tua ahile ka tapa awng, nang sia tua mihing pa khut sungah om ni hi, ahihang hisia vai taw na kipeal natu a manlang in ama va zuan ta'n a, hong maap natu in hesuak ngen ta'n.

⁴Nangma le nangma sia mut hun ahizong tawlngak hun ahizong kipia heak in.

⁵Savaipa thaang panin vacim ahizong, sangai ahizong a suatak bangin tua thaang panin pusuak in.

⁶Mihing dathamte in mitsate nuntakzia tung pan sin tahen.

⁷Amate in lampui ahizong, hausa, ukpi ahizong nei ngawl hi,

⁸ahihang amate in phalbi sung atu a kinginna in khaal lai in an koikhol hi.

⁹Mihing datham pa in bang tanvei lupna tungah lum tu ziam? Bang hun ciang hong tho peetma tu ziam?

¹⁰Ama in, “Tawmvei mu zok tong, leekoai in tawmvei sung tawlnga sin tong” ci hi.

¹¹Ahihang a mut lanin zawnna in hiamh toai ngualsuamte bangin ama sim tu hi.

¹²Mihing ngautaak ngawl, mi seksolte in leilot thu sonin vak kawkoai hi.

¹³Amate nang hong theam natu in a mit suukin a khut uh vik hi,

¹⁴tuasung theampo ah siatna taw kidim in a khel thinsung taw mun theampo ah nawngkaina piangsak tu in hol kawkoai hi.

¹⁵Hi thu hangin amate heakkhol ngawlin lalna in amate vaat tu a, tuaciangin amate sia thi theina ciang dongin liam tu uh hi.

¹⁶TOPA ii a etsat le a dual zawk ngawl thu nam sali om hi: Kiphatsakna maipuak, a theam thei leei, mawnei ngawlte a thatlum khut, seksol sawmin a ngaisun thinsung, siatna vawt tu a, a zuan ngang peangte, leilot thu khat zawkciang khat a son tetti, lawm le ngual sungah buaina pian natu a heltua pa cite ahi hi.

²⁰Ka tapa awng, na pa hong sonte vawt in a, na nu hong hilte mangil ngei heak in.

²¹Amate ii kammalte phawk tawntungin a, na thinsung ah kip takin ciamtee in.

²²Amate hong hilnate in khual na haw ciangin hong hu tu hi, zanin hong hung tu hi, tuaciang sunin ngaisutna pha hong pia tu hi.

²³Amate hong hilnate sia a taang khuavak hi; amate hong teknate in nuntakzia hong hil thei hi.

²⁴Tua hilnate in numei pha ngawlte kung panin hong keam tu hi; midangte zite ii zolna kammalte pan hong keam tu hi.

²⁵Amate mealphatna ip la heak in. Amate sikvil mit hana sungah awk heak in.

²⁶Pasal khat in anluum khat man za taw pumpi zuak numei khat nga thei hi, ahihang palngul mawna in a neisa theampo bosak tu hi.

²⁷Na puan kaangh ngawl hetin na awm ah meikuang na toai thei tu ziam?

²⁸Na peang kaangh ngawl hetin meikam tungah na pai thei tu ziam?

²⁹Ngual zi a luppui sia tuabangza ma in lauhuai hi. Tuabang a ngamta theampo in ngimna thuak tu hi.

³⁰A ngilkial laitak a, an a ngu nguta khat sia mihingte in zawngsak ngawl hi;

³¹ahitazong ama a kiman le a see sali in liau tu hi — a neisa theampo a piak siat kul tu hi.

³²Ahihang palngul mawna a vawt mihing khat in ngaisut kaakna nei ngawl ahi hi. Ama le ama a kilalsua hi lel hi.

³³Ama a min kisiasak tu a, kivelpheang tu hi; a tawntungin maimawl tu hi.

³⁴Pasal khat in a zi a muan nawn ngawl ciang a thin uuk za sangin a thin uuk zawk hun om ngawl hi; ama ii thuk kikna in ciangtan nei ngawl hi.

³⁵Ama in liausum bangma a saang buatu hi; letsong bangza po in a tam ta zongin a thin uukna thai zo ngawl tu hi.