Read Siyin Chin Paunakte 7 Bible Online

Paunakte 7 - Siyin Chin bible

Paunakte 7

¹Ka tapa awng, ka paunate ciamtee in a, kong sawlte vawt tu mangil ngei heak in.

²Kong sawlte seam lete na nungta tu hi. Na mittangte na huuk bangin kong hilnate kidawm in zui in.

³Kong hilnate a tawntung keamcing in; na lungtang tungah at in.

⁴Ciimna sia na suapuinu bangin ngaisun in a, thuthuk muna sia na ngualtamh phabel bangin ngaisun in.

⁵Tuate in ngual zite kung panin nang hong keam tu hi, zolna kampau thei numeite kung panin hong keam tu hi.

⁶Khatvei lai in ka khelki panin a pua sang khua ka et le

⁷bangma a khua he seam ngawl lai tangval tam mama ka mu hi, tuate sungah a mawmaw khat a tuamin ka ciamtee hi.

⁸Ama in numei khat ii teenna nai, lampi sia tawnin pai hi,

⁹tua hun sia nitak khuazin zawk ahi hi.

¹⁰Tuasia ciang tua nu in ama taw kisi hi; tua nu sia pumpi zuak numeite bangin kizeam a, tuaciang ama in niimna khat nei hi.

¹¹Ama sia hangin a maizum maw numei khat hi a, lampi ah vak tawntungin tua ahibuale

¹²lamking pan ngakin ding hi, khat vevei sia lampi ah, khat vevei le vanhzuakna phual ah ngakin om hi.

¹³Ama in tangvalpa ngawngkoai in namh a, a mittang salhin,

¹⁴“Tuni in biakpiakna ka vawt a, sangaw biakpiakna pan sa zongh ka nei hi.

¹⁵Tua ahikom nangma zong tu in kong pusuak hi. Kong mu nop bangma in hi sungah na om hi!

¹⁶Ka lupna sia Egypt pan puanneal a pawlkhat taw ka siin zo hi.

¹⁷Tua lupna sia myrrh, aloe le cinnamon thingnamtuite taw ka namtuisak zo hi.

¹⁸Hong pai ta'n! Zankhuateakin lumkhawm tawng. Khat le khat kikoai in nuamsa tawng.

¹⁹Ka pasal sia inn ah om ngawl hi. Khual khuala a haw laitak hi.

²⁰Ama in sum tam ma keng a, nipi nii sung hong cia ngawl tu hi,” ci hi.

²¹Tuabangin ama in tangvalpa sia ama thiamna taw zol a, numei ii kamthum kamzol in tangvalpa zo hi.

²²Thakhat thu in ama sia ngaw tu in a kipaipui khuital bangin numei nu taw pai a, thaang sungah a awk tu sangai bangin kilawn in tai hi;

²³tua thaang sia thaltang ii a lungtang a vutlet natu mun hi. Ama sia ngeen sungah a tum vacim bang hi a — ama nuntakna lauhuai ahi hunlam a he bua hi.

²⁴Tu in, ka tapate awng, hong ngai tavun. Ka pauna hong nadon tavun.

²⁵Tuabang numei khat in na thinzosak heak vun: ama ii nung zuikot heak vun.

²⁶Ama in pasal tam mamate ii lalcipna hi a, a kisim zo ngawl mihing tam mamate ii thina piangsak hi.

²⁷Ama inn ah na haw le mithi khua a zuazuan na hi hi. Tua in thi natu lamban khat ahi hi.