Read Siyin Chin Paunakte 8 Bible Online

Paunakte 8 - Siyin Chin bible

Paunakte 8

¹Ngai vun! Ciimna in hong sam hi. Thu tuatna in ama le ama hong kihiil hi.

²Lampi hui mualdawnte le lamkaate ah ding hi.

³Khuapi sung tumna mun, kongpite hui ah ama in hi bangin au hi:

⁴“Mihingte awng, hong maangkaa khi hi; leitung ah a om theampo sam khi hi.

⁵Puicing ngawl lai nu ziam? Puicin natu in kisin vun. Mawmaw nu ziam? Ngaisut theina na nei natu in sin vun.

⁶Ka kammal pha mamate hong ngai tavun; kong son theampo maan hi.

⁷Ka ci teng thumaan hi; leilot thu ngaimaw khi hi.

⁸Ka pau theampo thumaan hi; a maan ngawl ahibuale lampui khialna bangma om ngawl hi.

⁹Thuthuk a mu thei mihing khat atu in thiang sitset hi; pha tak a, a kihil sa khat atu in tel ol hi.

¹⁰Ngunn sangin kong lamlakna teal zaw vun; khamh phabel sangin heakna teal zaw vun.

¹¹“Keima in Ciimna ka hi hi, suangmanphate sangin ka phazaw hi; na dei theampo, kei taw a kitee ngat thei bangma om ngawl hi.

¹²Keima in Ciimna ka hi hi, thuthuk mu theina ka nei hi; keima in heakna le thukhenna maan ka nei hi.

¹³TOPA zatakna in a sia ngaimawkna ahi hi; kiphatsakna le kisaktheina, siatna lampite le a maan ngawl kammalte ka ngaimaw hi.

¹⁴Ngealnate ka nei a, tuabangin ka seam suak hi. Telthiamna ka nei a, ka thahat hi.

¹⁵Kumpite ngamukna le ngamukte ii upadi phate a vawtna ah ka hu hi.

¹⁶Leitung ah ngam uk theampo in keima huna taw ngam uk hi, ngam uliante ahizong nam liante ahizong ka hu hi.

¹⁷Kei hong itte ka it hi; kei hong zong po in hong mu thei hi.

¹⁸Haunate le minphatna, nopsakna le matutna piak tu ka nei hi.

¹⁹Kei tung pan na ngate in khamh phabel sangin phazaw a, ngunn ciitak sangin phazaw hi.

²⁰Thutang lampi ka tawn a; thukhaikim lampi ka zui hi,

²¹kei hong itte hauna ka pia hi, a innte uh sum le vanh manpha te taw ka dimsak hi.

²²“TOPA in a masa phitbel in kei hong bitphua a, khuangeipi lai in a nasep phitbel ka hi hi.

²³A kipatciil hun mama in kei hong kivawt hi, simlei a kipat ma in a masabel ka hi hi.

²⁴Tuipite a pian ma, ciktui te a om ma in ka piang zo hi.

²⁵Mualpite pian ma, mualnote a om natu tek ah a kikoi ma in ka piang zo hi,

²⁶Pathian in leitung le a lote a vawt ma, ahibuale leitang masabel sia khutdim a vawt ma ngawngawnin ka piang zo hi.

²⁷Van sia a om natu munah ama ii a koi hun lai, tuipi kaantan in vanmong a phalh lai,

²⁸van ah meeikaaite a koi lai, tuipi tuinaakte a hon lai le,

²⁹tuipi tuite ama ii ciza sangin a saangzawin a khanto ngawl natu thu a piak lai, leitung tawdapte a phaa lai in tua munah kei ka om zo hi.

³⁰Keima in ama kungah inn limsuaithiamte bangin ka om hi, kei sia ni simin ama ii lungdamna naak ka hi hi, tuaciang ama taw ka om sia nuam ka sa tawntung hi,

³¹simlei taw lungdam in mihing namte dik a sa pa ka hi hi.

³²“Tu in, khangmoite awng, hong ngai tavun. Ka ci bangin vawt vun, na lung uh dam tu hi.

³³No hong kihilte ngai vun. Ciim vun a; ngaingon heak vun.

³⁴Kei thu hong ngaipa in lungdam tu hi — Ni simin ka kongbiang ah om a, ka inn sung tumna pan hong ngak pa sia mihing lungdam ahi hi.

³⁵Kei hong mu pa in nuntakna mu a, tuaciang TOPA in ama diksa tu hi.

³⁶Kei hong mu ngawl pa in ama le ama kiliamsua hi; a kuama po kei hong ensan sia in thina dei ahi hi.”