Read Siyin Chin Thuhilsya 1 Bible Online

Thuhilsya 1 - Siyin Chin bible

Thuhilsya 1

¹Hite sia David ii tapa Jerusalem kumpipa ahi Thuthuk ngaisunpa ii kammalte ahi hi.

²Thuthuk ngaisunpa in a luithawthong, a luithawthong hi, ci hi. Nuntakna sia luithawthong, a vekpi luithawthong hi.

³Na nuntak sungah naseam in na diang uh a, ahihang bang teng na lak tu om na ziam?

⁴Khang khat piangin, khang khat bo hi, ahizong simlei sia a om ngei in om hi.

⁵Ni suak kik lai in, tum kik lai a, a sua natu munah heak kikin suak kik leleau hi.

⁶Vui zongh thang sangah vasuk, saksang ah vato, a kot a kotin va a, kipan kik nithi hi.

⁷Ngun theampo tuipi sungah luangsuk a, ahihang tuipi dimleet tuan ngawl hi. Ngunte kipatna ah tuite heak kik a, tuaciang kipan kik leleau hi.

⁸Na theampo in hong thinngimsak a, thinngimna sia kam taw son zawk hi ngawl hi. Ih mittang in a mu cim thei ngawl a, bil in a zaak cim ngeingawl hi.

⁹A piang ngeisa tengma piang kikik tu hi. A kiseam ngeisa tengma kiseam kikik tu hi. Simleitung bup ah a thak bangma om ngawl hi.

¹⁰Amate in, “En vun, hi sungah bang ziam maw a thak khat om hi!” ci uh hi. Hi ngawl hi, a piang ngeisa hi lel hi, ei sua ma pek a, a piang sa hi.

¹¹Hun bosa sung a thupiangte kuama in ciamtee ngawl a, tu le maisang kilaklaw hun sungah a piang thute kuama in ciamtee tuan ngawl tu hi.

¹²Kei, Thuthuk ngaisunpa sia Jerusalem ah Israel te kumpipa ka hi ngei hi.

¹³Hi leitung ah a kiseam na theampo kantel in sin tong ci in tupna ka nei hi. Pathian in eite tungah a ngimhuai haksatna hong pia hi.

¹⁴Hi leitung ah a kiseam theampo ka mu zo a, a luithawthong vive hi ci in kong son hi. Tuasia in vuiva delkot taw kibang hi.

¹⁵A koaite na maam thei bua a, a om ngawl nate na sim thei bua hi.

¹⁶Keima le keima, “Mihing thupi khat ka suak zo a, ka mai ah Jerusalem a ukte sangin ka ciim zaw pek hi. Ciimna le heakna tatak tel ing,” ka kici hi.

¹⁷Heakna le mawmawtna, ciimna le thin apnate a kilamdanna kan tu in ka khensat hi. Ahihang vuiva del taw ka kiban tu sia ka he hi.

¹⁸Ciim vaial leang thinngimna tam vaial a, heak vaial na in hong ngimsak vaial zawkan hi.