Read Siyin Chin Thuhilsya 12 Bible Online

Thuhilsya 12 - Siyin Chin bible

Thuhilsya 12

¹Na thinngim tu ni le a kum hong thet ma, “Nuntak paw nuamsa bong” na ci ma, na khangmoi lai in nang hong Bitphuapa phawk in.

²Tua hun sia, ni le tha le aksite ii tanna nang atu in a dial hun le ngua meei a ven nawn ngawl hun ahi hi.

³Tuasia ciang nang hong dal na baante liing tu a, tu laitak a, a hat na peangte tha zawm tu hi. Na hate na an thai tu in tawm lei tu a, na mitte mangin khua pha tak na mu thei buatu hi.

⁴Na bil in khuaza ngawl tu a, lampi ah awngingte na za buatu hi. An ngoaina sette a kingoai ciang ahizong, tumtheite a kitum ciang ahizong, nakheng phaksap vamial in na za tu a, ahizong vacim khat po haam in na mut hong phawng tu hi.

⁵Mun saangna ah na kiinta tu a, na lampai ciang lauhuai tu hi. Na puakkaang tu a; nangma le nangma kikai vakiat in, na lungngul theampo bo tu hi. Eite in a khakbel ih tawlngak natu mun ih zuan tu a, lampite ah mauna om tu hi.

⁶Ngunnkhau tat tu a, khamh meiinn taaksuk in tamhtham tu hi; tuikhuk ah khauzeen sia tatin tuibeal zaantham tu hi.

⁷Ih pumpite leivui ah cia kik tu a, ih thaa ahile nuntakna hong pia pa Pathian kung zuan kik tu hi.

⁸Luithawthong, luithawthong, Thuthuk Ngaisunpa in ci hi. A vekpi a luithawthong ahi hi.

⁹Thuthuk Ngaisunpa sia ciim ahikom ama in a heak thute mihingte tungah hil hi. Ama in paunakte encian a, tuate a maanna sittel hi.

¹⁰Thuthuk Ngaisunpa in a henepna kammalte zong a, ahihang ama ii a at kammalte a maan tatak veu hi.

¹¹Mihing ciimte ii paunakte sia tuucingte ii tuute a cinna tu a, a zak ciangzumte bang hi a, a khoptua paunakte sia kho takin a kikhen thikpimte bang ahi hi. Tuate sia eite theampo hong cing ih tuucingpa Pathian ii hong piak ahi hi.

¹²Ka tapa awng, kidop tu thudang khat om lai hi. Laibute a ki at sia tawp hun ci om thei ngawl a, lai tam lei simna in pumpi thazawmsak hi.

¹³Hite theampo zawkciang son tu thu khat bek om lai hi: Pathian thasia in a, a thupiakte ni in, banghang ziam cile hite theampo sia mihing a kibitphuana thu ahi hi.

¹⁴Pathian in ih sep ih vawtte theampo, a pha ahizong, a sia ahizong, ih vawt kute ngawngawn dongin thu hong khen tu hi.