Read Siyin Chin Thuhilsya 2 Bible Online

Thuhilsya 2 - Siyin Chin bible

Thuhilsya 2

¹Lungdamna zongin nuam ka sak babangin om tong ci in ka khensat hi. Ahizong, hisia zongh luithawthong hi veve hi.

²Nuina in mawmawthuai a, nopsakna in bangma phattuamna hong pia ngawl ci sia ka mu hi.

³Ciimna ka thangaina in kei hong tawsawn a, keima le keima thinnop ka kipiak natu in sapittui ne in hunnuam zak tu ka khensat hi. Hi leitung ah tawmvei a nuntak hunsung mihingte ngamtat zia tu sia hisia a phabel hi vak ci in ka ngaisun hi.

⁴Na lianpite ka seam zo hi. Keima atu in innte ka sa a, sapithuante ka vawt hi.

⁵Huan vawtin thingno ka ciing a, a sungah thingnga kung namcin om hi.

⁶Tuate tuibuak natu in tuikhukte ka to hi.

⁷Sila tam mama ka lei a, ka inn sungsuak sila tam mama om hi. Jerusalem khua ah a teang ngeite theampo sangin nganno tamzaw ka nei hi.

⁸Ka ukna ngam kumpi sumkholnate panin ngunn le khamhte ka la hi. Pasal le nupite in lasa in hong ngualnuamsak a, pasal khat ii dik a sak numeite ka dei zaza ka nei hi.

⁹Hi hi, kei ka lian a, Jerusalem khua ah a teang ngei khat po sangin ka lian zaw a, ka ciimna bo ngeingawl hi.

¹⁰Ka dei pawpo ka nga hi. Nopsakna a min piang, bangma ka kidan bua hi. Ka sep sa theampo tungah ka kisuangtaak a, hite theampo sia ka min phatna tel ahi hi.

¹¹Tuaciang ka sep sa theampo le haksa tak ka sepnate ka ngaisun a, bangma khiakna a nei ngawl hunlam ka phawk hi. Tuasia in vuiva del taw kibang a, kimanna om vet ngawl hi.

¹²Bangbang po ahizong kumpi khat in ama mai a, a seam kumpite ii sep sa teng seam thei bek hi. Tua ahikom ciimna, ahibuale maitatna, ahibuale mawmawtnate bang ziam cisia ngaisut ka kipan hi.

¹³Oh, he ing, “Khuavak sia khuazing sangin a phat zawk bangma, ciimna sia mawmawtna sangin phazaw hi.

¹⁴Mihing ciimte in a pai natu mun mu thei a, a mawmawte in mu thei ngawl hi,”. Ahihang eite theampo atu in mai sangah a kibangin ih thuak tu thu in hong ngak nginge ci sia zongh ka he hi.

¹⁵Keima in hi bang, “Mihing mawmawte tungah a tung thu sia kei tung zongh ah hong tung tu hi. Tua ahikom ka ciim mama na in bang meetna hong pia ziam?” ci in ka ngaisun hi. Bangma hong pia ngawl hi, na khat beak zongh hong pia ngawl hi,” ci in ka zo kik hi.

¹⁶Kuama in mihing ciimte phawk ngawl a, kuama in a mawmawte phawk ngawl hi. Hong pai tu hunte sungah ih vekpi in hong kimangil siat tu hi. A ciim le a mawmaw a kibangin ih thi siat tu hi.

¹⁷Tua ahikom nuntakna in kei atu bangma khiakna nei ngawl hi, banghang ziam cile nuntakna in ngimna simngawl bangma hong puak ngawl hi. Na theampo a luithawthong hi a, vuiva del bang ahi hi.

¹⁸Naseam a, ka thalawte khiakna nei ngawl hi, banghang ziam cile ka za hong laih tu sia atu in a nusiat tu ka hi hunlam ka he hi,

¹⁹tuaciang tua pa a ciim ahile, a mawmaw ahi akua in he ziam? Ahizong ka sep ka vawt theampo, ka ciimna ii hi leitung ah kei atu a thalaw theampo ama in lua tu hi. A vekpi a luithawthong ahi hi.

²⁰Tua ahikom nasia tak na ka sep sia ka kisiik hi.

²¹Na khat pawpo atu in na ciimna, na heakna le na thiamna theampo taw naseam a, a zawkciang tua na sia a seam ngawl het khat tungah na nusiat lel tu hi. A luithawthong hi a, maan zongh maan ngawl hi.

²²Na nuntak sungah thinngim tak ngimin na na sep hangin bang na lak tu om na ziam?

²³Na nuntak laiteng na sep na vawt theampo in thinngimna le thin natna simngawl bangma dang hong puak ngawl hi. Zan ngawngawn in na mutmawklaw hi. A vekpi a luithawthong ahi hi.

²⁴Mihing khat ii a phabel a sep thei sia neak tu dawn tu le a thalaw sa teng taw a lungkim tu ahi hi. Ahizong, hisia ngawngawn Pathian kung pan hong pai hi, cisia ka phawk hi.

²⁵Tua ngawlin bangbangin neak tu le lungkim natu koisung pan nga thei tu ni ziam?

²⁶Pathian a lungdamsak te tungah Pathian in ciimna, heakna, le lungdamna pia hi, ahihang mimawte ii thalaw sate ama a lungkimsakte tungah a piak thei tu in ama in mawneite na seamsak, sum thalawsakin sum kholsak hi. A vekpi a luithawthong ahi hi. Tuasia in vuiva delkot bang ahi hi.