Read Siyin Chin Thuhilsya 3 Bible Online

Thuhilsya 3 - Siyin Chin bible

Thuhilsya 3

¹Hi leitung ah a piang na theampo Pathian see sa bangin piang hi.

²Ama in pian natu le thi natu hun, suan tu hun le bawkeak tu hun,

³thalup tu hun le damsak tu hun, phelthap tu hun le sakto tu hun ciangtan hi.

⁴Ama in hee natu hun le lungdam natu hun, mau tu hun le lap tu hun,

⁵ki it tu hun le ki etsat tu hun, kinap tu hun le kinap ngawl tu hun, ciangtan hi.

⁶Ama in zon tu hun le bosua tu hun, top tu hun le vawk tu hun,

⁷balthap tu hun le khuikhop tu hun thim dide in om tu hun le pau tu hun ciangtan hi.

⁸Ama in it tu hun le etsat tu hun, ngal kisim tu hun le kilem tu hun ciangtan hi.

⁹Ih sep ih vawtte theampo pan bang meetna nga hi ziam?

¹⁰Pathian in vanh ngitpi eite hong sot ka he hi.

¹¹Ama in na theampo atu hun a lem tu in ciangtan hi. Ama in maisang hong pai tu thute heak nopna thin hong pia ahihang ama ii sep le vawtte a cingin hong telsak ngeingawl hi.

¹²Tua ahikom ih nuntak laiteng ih lungdam tu le ih sep thei bang a phabel ih sep tu ahi hunlam ka he hi.

¹³Ih sep thaman taw ne in dawnin, ih nopsak tu ahi hi. Tuasia in Pathian ii letsong ahi hi.

¹⁴Pathian ii sep theampo sia a tawntung atu ahi hunlam ka he hi. Bangma belap heak in a, bangma dawk kik heak in. Pathian ii na a sep khat sia ama ih zatak natu ahi hi.

¹⁵A piang na khat ahibuale a piang tu na khat sia a piang ngeisa ahi hi. Pathian in na khat sia a kibangin piangsak kikik hi.

¹⁶Tua bek dom ngawlin hi leitung ah thutang le thumaan om tu kilawm napi ngitlo khansiatnate na mu sia kei zongh ka mu hi.

¹⁷Keima le keima, “Pathian in mihing phate le mihing siate a kibangin thu khen tu hi, banghang ziam cile na a kiseam theampo sia a hun a kiciangtan bangin piang tu hi,” ka kici hi.

¹⁸Eite nganhingte sangin ih phat zawk tuan ngawlna hong lak tu in Pathian in eite hong ze et ci in ka khensat hi.

¹⁹A tawpna ah, mihing le nganhing ii a thuak tute in a kibangin ngak hi. Nganhing bangma in mihing zongh thi hi. Amate in bitphua nam hi khawm hi. Mihing khat sia nganhing khat sangin phazaw tuan ngawl hi, banghang ziam cile amate atu in nuntakna in khiakna nei ngawl hi.

²⁰Amate mun khat zuan khawm tu a, leivui suak tu uh hi. Amate leivui pan hong paikhawm uh a, leivui ah ciakhawm kik tu uh hi.

²¹Banghangin khat po in mihingte ii thaa sia tungsang zuanto a, nganhingte ii thaa ahile leinuai zuansuk hi, ci in tel thei tu ziam?

²²Tua ahikom ih sep thei a phabel sia ih sepsa tungah ih lungkim thei tu ahi sia ka phawk hi. Ih vawt thei dang bangma om ngawl hi. Ih thi zawkciang bang suak tu cisia ih heak thei natu lampi om ngawl hi.