Read Siyin Chin Thuhilsya 4 Bible Online

Thuhilsya 4 - Siyin Chin bible

Thuhilsya 4

¹Tuaciang hi leitung ah a piang thumaan ngawlna theampo ka en kik hi. A kivawtsiate kakap a, kuama in hu ngawl hi. Kuama in amate hu ngawl tu hi, banghang ziam cile amate a vawtsiate in thahatna nei hi.

²A thi le a bo sate ka eang hi, a nungta laite sangin amate nuamsa zaw pek hi.

³Ahihang tuate sangin a hamphazaw laite sia hi leitung ah a piang thumaan ngawl a mu ngeingawl, a piang ngawl laite ahi hi.

⁴Mihingte in ngual a zaw natu in banghangin nasia tak na seam ziam ci zongh ka tel zo hi, banghang ziam cile a innpaamte a een hang ahi hi. Ahihang tuasia in a luithawthong ahi hi. Tuasia in vuiva del taw kibang hi.

⁵Mihing khat pukthi liang dongin leekoai in a omcipna sia mawmawt vai hi, amate in ci hi.

⁶Tua zongh hi thei tha tu hi, ahihang vuiva man nuam a, khut nii taw komlaak tawntung sangin thinnopna taw, tawmno ih nei sia phazaw hi.

⁷Nuntakna sungah luithawthong ahi, thudang khat zongh ka mu hi.

⁸Hi sungah ama nguakin a teang khat om hi. Ama in tapa le nei ngawl, suapui le nei ngawl hikale ama sia na seam tawntung a, bangma hunin a hauna taw lungkim ngeingawl hi. Ama le ama nopsaknate nialin, akua atu in nasia takin na seam ziam? Tuasia zongh luithawthong hi a, tuaciang a ngim huai mama nuntakzia ahi hi.

⁹Khat sangin nii phazaw hi, banghang ziam cile amate ngeal in a kizen zaw in naseam khawm thei hi.

¹⁰Amate khat a puk le a dang khat in phongto thei hi. Ahihang khat nguak a om khat sia puk le mansa hi lel hi, banghang ziam cile kuama a hu tu om ngawl hi.

¹¹Khua a sik le nii lumkhawm leang khualum thei hi, ahihang nang nguak bangbangin na khua lumsak thei tu ni ziam?

¹²Khat nguak ii lel tu kisimna sia nii in zo thei hi. Khauzam thum taw a kipheak khauzeen sia a tat tu haksa hi.

¹³Mihing khat sia zawnna panin a ngam ii kumpi suak tu in khangto thei a, ahibuale thonginn pan kumpi tokhum dong kaato thei hi, ahizong a khan haam ciang ngual ii ngaisut pha piakte saan ngawl tu dongin a mawmaw le, tua pa sangin khangmoi a zawng a pil khat phazaw hi.

¹⁵Hi leitung ah a teang mihing theampo ka ngaisun a, amate sungah kumpipa ii dinmun a la tu khangmoi khat a om sia ka phawk hi.

¹⁶Kumpipa khat ii a uk mihingte sia kisim zo ngawl tha tu a, ama a thi zawkciang ama nasep sate hangin a lungdam khat beak om ngawl tu hi. Tuasia in luithawthong ahi hi. Tuasia in vuiva del bang ahi hi.