Read Siyin Chin Thuhilsya 5 Bible Online

Thuhilsya 5 - Siyin Chin bible

Thuhilsya 5

¹Biakinnpi ah na pai ciang kidawm in. Tua munah pai in thusin tu sia, a maan le a maan ngawl a he ngawl mihing mawmawte ii sangaw biakpiakna sangin phazaw hi.

²Na pau ma in ngaisun phot in a, Pathian tungah kamciam vawt memeang heak in. Ama sia vantung ah om in, nang sia leitung ah om a, tua ahikom na pau tu za sangin a tamzaw pau heak in.

³Na thinngimna a tam zaza in na mang sia vaial tu hi. Kam tam na pau zaza in mawmawt kamte na pau tha tu hi.

⁴Tua ahikom Pathian tungah kamciam na piak ciang, manlang takin taangtungsak in. Ama in mihing mawmawte diksa ngawl hi. Na kamciam bangin vawt in.

⁵Kamciam pia a, nasep ngawl sangin kamciam piak awl lete phazaw hi.

⁶Khial tha ing ci in Pathian thiampipa mai ah na son kul tu ahikom, na kampauna in khialna sung thensak heak in. Banghang na tungah Pathian thin uuksak ni ziam? Nasep sa theampo ama in banghang laltham siatsak ni ziam?

⁷Bangza in mang na man a, bangza in a luithawthong nasep naseam zong, ahibuale bangza in na pau hial zong, Pathian na zatak veve kul lai tu hi.

⁸Kumpite in mizawngte vawtsia in amate hamphat natu te danh in thumaan ngawlin thu a khen na mu ciang lamdang sa heak in. Ulian khat pawpo, a tungsia a ulian sia in vuumsit a, amate ngeal sia a tung sawn a sia in vuumsit lalai hi.

⁹Kumpi khat ngawngawn in thaw an suang hi.

¹⁰Sum na it le na lungkim ngeingawl tu a, hau tu na lungngul le na dei theampo na nga ngei buatu hi. Tuasia in a luithawthong ahi hi.

¹¹Na hau vaial le na vaak tu tam vaial tu hi. Na meet belna sia na hau hunlam na heak sia bekma hi tu hi.

¹²Naseam khat sia a neak khom tu zongh nei thei a, nei ngawl thei si hi, ahizong ama sia zanin a mut nuam lel hi. Sumhaupa sia, nei leilam ahikom thinngim a, zanin mutthip thei ngawl hi.

¹³Hi leitung ah a lauhuai ka mu thu khat om hi: mihingte in a kitaangsap uh ciang a zak tu in a sum tawm uh hi,

¹⁴tuaciang nasep pha ngawl khat tungah sumhcip in a tate atu zongh bangma kheet ngawl hi.

¹⁵Hi leitung ah pumnguak in ih sua bangma, pumnguak in ih nusia hi. Bangza po ih seam zong ih ken thei bangma om ngawl hi.

¹⁶Hi thu maan ngawl hi! Ih pai lai bang lianin ih cia kik hi. Na ih seam a, vui man tu in ih hanciam hi, ahihang bang nga na hi ziam?

¹⁷Eite sia khua zing sungah heena, thinngimna, thin uukna le ciinat thuakin ih nungta hi.

¹⁸Hi sungah ka phaw thu om hi: Pathian ii hong piak nuntak tomno sungin ih sep thaman ne in dawnin, nuamsa in ih om tu sia a phabel ahi hi. Hisia in mihing ii thuak tu nuntakzia ahi hi.

¹⁹Pathian in mihing khat hauna le neisa lamhsa pia in tuate tungah a lung a damsak le ama sia lungkim in a sep a vawt tungah nuamsa tu hi. Hisia in Pathian letsong ahi hi.

²⁰Pathian in ama lungdamsak ahikom, a nuntakna a tom hunlam thinngim leilam ngawl tu hi.