Read Siyin Chin Thuhilsya 6 Bible Online

Thuhilsya 6 - Siyin Chin bible

Thuhilsya 6

¹Hi leitung ah a nasia mama a maan ngawl het a kivawt khat om ci sia ka mu hi.

²Pathian in mihing khat sia hauna, min phatna le neisa pia hi, hi hi, a dei theampo pia hi, ahihang tua vanhte tungah nopsakna pia ngawl hi. Khualmi khat po in nopsak law tu hi. Tuasia in a luithawthong ahi hi, maan ngawl het hi.

³Mihing khat in ta zakhat nei in, a khansau kale, bang tanvei po a nungta zong, ama ii tel tu lungdam na a nga bua a, a thi ciang pha tak a kiphum buale, nausen a thisa in a suak sia phazaw lai hi, ka ci hi.

⁴Tua nausen a sua hu in phattuamna om ngawl hi; ama sia khuazing sungah bo in kimangil hi.

⁵Tua nausen in sun khuavak sia mu ngeingawl a, nuntak zongh bangbang hi ci in he ngawl hi, ahihang ama in a no belin tawlngakna a mu hi.

⁶Ama in kum tulnii nungta kale, a nuntak sung thinnopna a nei ngei buale a thisa a suak tua nausen sia phazaw hi. A tatak ci leang amate ngeal in a zot natu mun kibang hi.

⁷Mihing khat in bang khat po a neak thei natu in naseam ahihang a kicing in nei ngeingawl hi.

⁸Bangbangin mihing ciim khat sia a mawmaw khat sangin nuamsa zaw ziam? Mizawng khat in nuntak natu zia a heak hangin bang phatuam ziam?

⁹Tuasia in a luithawthong hi. Tuasia in vuiva delkot bang ahi hi. Na neisa taw na lungkim tu sia, nadang dei tawntung sangin phazaw hi.

¹⁰Na a piang theampo sia taanghtawng lai pan a piang tu in a kiseesa hi a, mihing khat in ama sangin a hat zaw mihing khat ii kam nial thei ngawl ci sia ih he siat hi.

¹¹Na nial vaial le a luithawthong hi vaial a, nang sia phazaw tuan ngawl ni hi.

¹²Limh khat bangin a papai nuntakna sia a luithawthong ama nuntakna hi a, a tom a nuntak sungah mihing atu a phabel sia akua in he thei tu ziam? Bangbangin mihing khat in a thi zawkciang leitung ah bang thu piang tu cisia he thei tu ziam?