Read Siyin Chin Thuhilsya 8 Bible Online

Thuhilsya 8 - Siyin Chin bible

Thuhilsya 8

¹Nate ii khiakna tatak sia mihing ciim khat bek in he hi. Ciimna in ama maitaisak a, a mai siatna teng bosak hi.

²Kumpipa ii ci bangin vawt in a, Pathian tungah kamciam pia memeang heak in.

³Kumpipa in a uk po vawt thei a, tua ahikom ama omna pial in; tuabang a lauhuai munah om heak in.

⁴Kumpipa in a thuneina taw ngamta a, ama ii sepna sia kuama in thato thei ngawl hi.

⁵A thupiakte na nit lai tengin ngimna na thuak buatu a, tuaciang mihing ciim khat in koibang le bang hun ciang vawt tu ci sia he hi.

⁶Na theampo vawt natu a hun maan le sepzia maan om a, ahihang ih heak thu tawm lei hi!

⁷Bang hong piang tu cisia kuama in ih he bua a, ei hong son tu kuama om ngawl hi.

⁸Kuama in thina pial thei ngawl a, a thi tu ni khangkhan thei ngawl hi. Tua in ih pial thei ngawl ngal kisimna khat hi a, ih ngelku thei bua hi.

⁹Hi leitung ah a kivawt sate ka ngaisut ciang hite theampo ka mu a, hi leitung ah mihing pawlkhat in thahatna nei a, pawlkhat te in tuate khutnuai ah thuak uh hi.

¹⁰Hi hi mi seksolte amate thaankuul sungah kiphum ka mu a, ahihang a phuum mihingte thaan pan a cia kik uh ciang, amate ii a sia a vawtna, khuapi sung mama ah a khua mite in amate pok uh hi. Tuasia in a luithawthong ahi hi.

¹¹Banghangin mihingte in ol vazeang in khutkhial ziam? Banghang ziam cile khut khialna sia man lalang in daan a kipiak ngawl hang ahi hi.

¹²Mihing khial khat in khut khialna zakhatvei vawt a, ahizong nungta veve hi. Oh, hi hi, amate kampau nate ka he a, “Pathian thu na ni uh le na theampo a pha in piang tu hi,

¹³ahizong mihing ngilote atu in phatna om ngawl tu hi. Amate ii nuntak hun sia limh khat taw kibang a, Pathian thu ni ngawl ahikom amate khanthi tu hi,” ci hi.

¹⁴Ahihang hite nawnsan thu ahi hi. Leitung ah bang thu piang ziam ci sia en vun; khat vevei mihing thutangte in misiate ii thuak tu daante thuak a, misiate in thutangte min phatna tel nga hi. Hisia in a luithawthong hi, ka ci hi.

¹⁵Tua ahikom mihing khat in a nuntak sungin nuam a sak tu ngawl a dang om ngawl ahikom anne tuidawn in, a lungkim tu bek a hina ka he hi. Pathian in hi leitung ah nuntakna a piak hun sung teng, ama in a sep thaman nga thei tu hi bek hi.

¹⁶Ciim tu hanciam in hi leitung ah bang piang cisia ka tel ciangin sun zong zan zong mu ngawlin na om thei sia ka phawk hi,

¹⁷tuaciang Pathian in bang seam cisia ka tel zo bua hi. Bangza po na hanciambel hang na tel zo ngei buatu hi. Mihing ciimte in he kisa tha tu hi, ahihang amate he ngawl uh hi.