Read Siyin Chin Thuhilsya 9 Bible Online

Thuhilsya 9 - Siyin Chin bible

Thuhilsya 9

¹Hi thute theampo khuangeipi le nasia takin ka ngaisun a, Pathian in mihing ciimte le mihing thutangte ngamtatna te, amate ki itna le kihuatna ngawngawn uk hi cisia ka phawk hi. A mai ah bang om ziam ci sia kuama in he ngawl hi.

²A kilamdanna om tuan ngawl hi. Thutangte le a ngilo te, a phate le a siate, biakna hanciamte le a awlmaw ngawlte, sangaw biakpiakna a vawtte le a vawt ngawlte tungah a kibangin thina theng hi. Mihing pha khat sia mihing khial khat taw kitumdang ngawl a, tom lo in a kiciam khat le a kiciam ngawl khat kitumdang tuan ngawl hi.

³Thina sia mihing theampo tungah a kibangin tung a, hi thu mama zongh, leitung ah a piang na dangte bangma in maan ngawl hi. Mihingte a nuntak laiteng a thinsung uh sia siatna le mawmawtna taw kidim a, amate thakhat thu in thi uh hi.

⁴Ahizong leitung ah a nungta khat pawpo in lametna pawlkhat nei a, ui nungta khat sia tawpi thisa khat sangin phazaw hi.

⁵Hi hi, a nungtate in a thi tu uh he a, ahizong a thite in bangma he ngawl hi. Amate in min phatna tel bangma nei tuan ngawl a, amate kimangil cip hi.

⁶A ki itna, a kihuatna, cii le sa uukna te a vekpi in amate taw thi khawm hi. Hi leitung ah a piang nate khat pawpo sungah amate kihel kik nawn ngawl hi.

⁷Pai in, na an ne in a, lungdam in; na sapittui ne in a, maitai in. Pathian in diksa hi.

⁸A tawntung lungdam in, maitai in.

⁹Pathian hong piak hi leitung ah a mannung ngawl na nuntak hunsung teng na it numei taw a nuamin nungta in. A mannung ngawl nite a nuamin zangh in, banghang ziam cile, tuasia bekma na ngim thaman na saan tu ahi hi.

¹⁰Na sep pawpo hanciam in seam in, banghang ziam cile mithite ngamah, tukna, dianna om ngawl, khua ngaisutna, heakna, ciimna om ngawl tu hi — tua mun sia na zotna tu mun ahi hi.

¹¹Thudang khat zongh ka he lai hi, hi leitung ah tai ngang theampo in zawna nga tawntung ngawl a, ngalhang theampo in ngalzo tawntung ngawl hi. Mihing ciimte in nuntak natu thalaw tawntung zo ngawl a, mihing pilte zongh hau tawntung ngawl hi, hi theina a nei theampo dinmun sang theng tuan ngawl hi. Kaamsiatna sia mihing theampo tungah tung hi.

¹²Na hun hong thet tu na he ngei bua hi. Thakhat thu in vacimte thaang sungah a kimat bang, ngasate ngeen taw a kimat bangin, eite zongh ih muanmawk ngawl het laitakin thaang sungah hong kiman hi.

¹³Nadang khat ma ka mu a, ciimna sia hi leitung ah a thupi in a kingaisut zia ahi hi.

¹⁴Khua khat om a tua ii sungah mihing tam teang ngawl hi. A thahat kumpipa khat in tua khua sim hi. Ama in uumci a, a luphungte sutham tu in kipan hi.

¹⁵Tua khua ah mizawng ahihang khua khat a hu zo tu mihing pil mama khat teang hi. Ahizong kuama in ama phawk ngawl hi.

¹⁶Ciimna sia hatna sangin phazaw hi ka ci tawntung hi, ahizong kuama in mizawngpa sia mihing ciim in ngaisun ngawl a, ama paunate kuama in nadon ngawl hi.

¹⁷A kamneam mihing ciim khat ii pauna sia mihing mawmaw honkhat kikhopna sungah a lampuipa auna ngai tu sangin phazaw hi.

¹⁸Ciimna in ngalhiamte sangin a pha seam thei zaw a, ahizong mihing khial khat in na pha tam mama lalsak thei hi.