Read Siyin Chin Solomon ii La 3 Bible Online

Solomon ii La 3 - Siyin Chin bible

Solomon ii La 3

¹Ka lupna tungah ka lum a zan simin, ka it ka ngaino ka mang in ka man hi. Ama ka zong a, ahihang ka mu zo bua hi.

²Khuapi sungah ka vavak a, a lamliante le a lamzinte kaantan in, ka it ka ngaino ka zong hi, ahizong ka mu zo bua hi.

³Khuapi a cing ngalvilte in kei hong mu hi. Amate tungah “Ka ngaino na mu uh ziam?” ci in ka dongh hi.

⁴Amate ka nusiat po ciang ka ngaino ka mu hi. Ama ka lencip a, ka nu ii inn sung ka suana inndoi sung ka thet pui dong ama ka thasua bua hi.

⁵Jerusalem numeite awng, ko ii ki itna nong pheltan ngawl natu in, a zuanngang sangaite le sazate min lo in kei hong kamciam tavun.

⁶Sennealngam pan meikhu khuam khat bang, ngimnamtui le sum vawtte ii zuak paaknamtui bang, myrrh thingnaai namtui taw hong pai sia a bang ziam?

⁷Solomon kumpipa a kumpi tokhum tungah to in, kizawng in hong pai hi. Israel ngam a ngalkap phabel sawmlukte in cing uh hi.

⁸Amate theampo namsau zak thiam tek hi. Amate sia ngalsim a thiam ngiingeei sa ngalkap luite ahi uh hi. Zanin a sim a om le a do tu in amate namsau khat tek toai uh hi.

⁹Solomon Kumpipa sia a phabel thing taw a kivawt kumpi tokhum tungah to in, kizawng hi.

¹⁰A khuamte sia ngunn taw kizeam a; a tungah khamh taw a kizeam puan kikoi hi. A tophate sia Jerusalem numeite ii itna takpi taw a taa puan sandup taw kituam hi.

¹¹Zion numeite awng hong pai tavun a Solomon Kumpipa en vun. Ama in a zi nei ni, a lungdam ni le a thinnop ni in a nu ii a lu tungah a khuksak kumpilukhu sia khu hi.