Read Siyin Chin Solomon ii La 4 Bible Online

Solomon ii La 4 - Siyin Chin bible

Solomon ii La 4

¹Ka ngaino awng, na mealpha lawlawm hi! Na mai sealna dial ii nungah a ithuai na mittangte tee vakil hi. Na sam sia Gilead mualpangh suk a, keal hon tai bangin kithing hi.

²Na hate sia a mul a kimeet tawm, a kisilthiang tuute bangin paak hi. Khat beak zongh tongh ngawlin kikim diimdiam hi.

³Na mukte puansan khaupheang khat bang hi a; na pau ciang bangza in etlawm ziam? Na biangte sia na kisealna dial nungah san sitset hi.

⁴Na ngawng sia ngalhangte zak lum tulkhat a kikhai zeizoina ngil kilkel in a beam David ii tausaang taw kibang hi.

⁵Na noaite sia unok paak kawm ah an ne a, a taa khawm saza, apeang sangaite bang ahi hi.

⁶Keima in zingvui a vak vahiau mateng le khuavak mahiat dong myrrh thingnaai namtui mual, ngimnamtui mualtung ah ka om tu hi.

⁷Ka ngaino awng, na mealpha lawlawm a; Paubanna na nei bua hi!

⁸Ka angkoai awng, Lebanon mual panin kei hong zui ta'n, Lebanon panin hong zui ta'n, Tawpite le pawlbeamte teenna, Amana Mualdawn, Senir Mualdawn le Hermon Mualdawn panin hong tuaksuk ta'n.

⁹Ka ngaino le ka angkoai awng, na mit ha zia le na khi aw ziate in ka thin ka lung hong vut hi.

¹⁰Ka ngaino le ka angkoai awng, nong itna in ka thin hong nuamsak hi. Nong itna sia sapittui sangin thum zaw a, na paaknamtui sia a dang hel namtuite sangin namtui zaw hi.

¹¹Kong it ngaino awng, na muk sia khuaitui bangin thum a, na leei sia kei atu in, khuinoai le khuaitui ahi hi. Na puansilhte sia Lebanon ii paaknamtui namcinte nam hi.

¹²Ka ngaino, ka angkoai sia a kiseal huan, a ki uumcip huan, aituam tuinaak ahi hi.

¹³Tua munah thingkungte dawngin khang hi. Amate sia talee kung bangin po a, nga pha belte nga hi. Henna thingnamtui, nard thingnaai namtui, saffron, calamus le cinnamon pan kipan thing ngimnamtuite kamh ngeingawl hi.

¹⁴Tua munah a namtuibel myrrh le aloe te po hi.

¹⁵Lebanon Mualte panin luamtui a luangsukte le ciktui te in tua huan tui kawtsakin lei zenhsak hi.

¹⁶Khanglo vun, Saksang vui awng. Thangsang vui awng, ka huan sungah va vun; ngimnamtui taw dimsak vun. Ka ngaino sia ama ii huang sungah hong pai in thingnga a limbel teng ne tahen.